Autoritetet shëndetësore në shtetin indian të Kerala kanë lëshuar një alarm pasi një djalë 14-vjeçar vdiq nga virusi Nipah.
Sipas autoriteteve tw atyshme, 60 persona të tjerë janë identifikuar si të rrezikuar nga sëmundja.
Ministri i Shëndetësisë në Kerala, Veena George tha se djali është nga qyteti Pandikkad dhe ata që ranë në kontakt me të janë izoluar dhe testuar.
Njerëzit në zonë u është kërkuar të mbajnë maska dhe të mos vizitojnë njerëzit në spitale.
Infeksioni me virusin Nipah është një sëmundje që transmetohet nga kafshët si derrat dhe lakuriqët e natës së frutave te njerëzit, sipas Organizatës Botërore të Shëndetësisë (OBSH).
Mund të transmetohet edhe nëpërmjet ushqimit të kontaminuar dhe kontaktit me një person të infektuar.
Virusi ka qenë i lidhur me dhjetëra vdekje në shtetin e Kerala që kur u raportua për herë të parë atje në 2018.
14-vjeçari vdiq të dielën, vetëm një ditë pasi u konfirmua se ai kishte virusin, shkruan BBC.
Pjesë të Keralës thuhet se janë globalisht më të rrezikuara nga virusi. Një studim i publikuar nga Reuters vitin e kaluar zbuloi se Kerala, e cila është një vend tropikal dhe po përjeton urbanizimin e shpejtë dhe humbjen e shpejtë të pemëve, ka krijuar “kushte ideale për shfaqjen e një virusi si Nipah”.
Ekspertët thonë se për shkak të humbjes së habitatit, kafshët jetojnë më afër njeriut dhe kjo ndihmon që virusi të kalojë nga kafshët te njerëzit. Qeveria e shtetit njoftoi kohët e fundit se po harton një plan veprimi për të parandaluar shpërthimet e Nipah.
Vitin e kaluar, autoritetet në shtetin Kerala mbyllën shkollat dhe zyrat pasi konfirmuan pesë raste.
