Ministrat e Jashtëm të G20 bënë thirrje për veprim shumëpalësh për të gjetur zgjidhje për krizat globale si pandemia COVID-19 dhe emergjencat, në takimin e tyre të parë në dy vjet.
Takimi një ditor në qytetin e nxehtë jugor italian të Materas u përqëndrua në një debat mbi mënyrat për të rritur bashkëpunimin në një varg çështjesh, nga ringjallja e ekonomisë pas një pandemie, emergjencash, deri te rritja e zhvillimit të qëndrueshëm në Afrikë, raportoi Reuters.
“Pandemia ka theksuar nevojën për një përgjigje ndërkombëtare ndaj emergjencave që kapërcejnë kufijtë kombëtarë,” tha ministri i Jashtëm italian Luigi Di Maio.
Anëtarët e G20 përbëjnë më shumë se 80 përqind të prodhimit të brendshëm bruto botëror (PBB), 75 përqind të tregtisë globale dhe 60 përqind të popullsisë totale të botës.
Midis pjesëmarrësve në takimin në Matera janë kryesisht diplomatë nga SHBA, Japonia, Britania, Franca, Gjermania dhe India, ndërsa ministrat e jashtëm të Kinës, Brazilit dhe Australisë vendosën të ndiqnin diskutimin përmes lidhjes video. Rusia dhe Koreja e Jugut dërguan zëvendësministrat.
Gjatë pushimit në seancë, Ministri i Jashtëm gjerman Heiko Maas deklaroi se ai pendohet për mungesën e kolegëve nga Pekini dhe Moska, pasi ai beson se një dialog me Rusinë dhe Kinën është i nevojshëm.
Maas gjithashtu njoftoi më herët se ai do të shprehte pakënaqësinë me mënyrën në të cilën Kina dhe Rusia ofruan vaksinat e tyre me qëllim që, sipas mendimit të tij, të forconin marrëdhëniet e tyre me vende të caktuara.
“Kjo nuk ka të bëjë me arritjen e përparësive gjeostrategjike afatshkurtra,” tha ai përpara takimit.
Sekretari i Shtetit i SHBA Antony Blinken përsëriti rëndësinë e shpërndarjes së vaksinave në vendet e varfëra nëse duam t’i japim fund pandemisë, duke shtuar se kriza shëndetësore ka përkeqësuar pabarazinë ekonomike globale dhe se G20 do të vazhdojë të ndihmojë vendet me të ardhura të ulëta të adresojnë cenueshmërinë e tyre të konsiderueshme të borxhit .
“Ne duhet të bashkëpunojmë dhe duhet ta bëjmë atë në mënyrë efikase. Multilateralizmi është ai që na mundëson ta bëjmë atë,” tha Blinken gjatë fjalimit të tij në konferencë.
Italia, shtëpia e Agjencisë së Ushqimit dhe Bujqësisë të KB (FAO), ka bërë thirrje për një takim të ministrave të zhvillimit me synimin për të vendosur në ballë sigurinë globale të ushqimit dhe të ushqyerit.
“Unë jam i mendimit se G20 ka një detyrim të mbështesë Afrikën për të dalë nga kjo periudhë e vështirë dhe për të filluar një fazë të një rritje të qëndrueshme,” u tha gazetarëve Luigi Di Maio.
Ai theksoi se përkundër të gjitha dallimeve dhe ndarjeve midis disa vendeve gjatë konferencës G20, të gjithë bien dakord që ne duhet të bashkëpunojmë për ndryshimin e klimës në mënyrë që shoqëria jonë të jetë e qëndrueshme.
Duke pasur parasysh gamën e larmishme të vendeve brenda G20, arritja e një marrëveshje mund të jetë e vështirë, por analistët thonë se fakti i rëndësishëm është se ministrat kanë vazhduar me takime të drejtpërdrejta për të ngritur zërin e tyre për të rritur bashkëpunimin.
