Përfaqësuesi i Partisë Popullore të Austrisë (OVP) në Kuvendin austriak, Martin Engelberg, beson se tani është koha kur duhet një angazhim i qartë perëndimor dhe thotë se Austria është një vend që mbron anëtarësimin e shpejtë të Ballkanit Perëndimor në Bashkimi Europian.

Engelberg, i cili mori pjesë në tubimin “Bisedimet Strategjike Ekonomike” në Istria, organizuar nga Shoqata për Zhvillimin e Rrjetit të Biznesit të Evropës Juglindore (SEEBDN), tha se kriza e Ukrainës është një sfidë e madhe, të cilën ai do ta quante “Super 9/11” , sepse solli një kthesë të re të madhe në botë.

“Tani Perëndimi duhet të veprojë në unison. Demokracitë perëndimore duhet të punojnë së bashku kundër vendeve që nuk i mbështesin këto vlera. Është gjithashtu e rëndësishme që shtetet ballkanike të marrin pjesë në këtë. Unë jam dikush që kërkon një deklaratë të qartë. Austria është gjithashtu një shtet neutral, por vetëm ushtarakisht. Ne nuk jemi politikisht neutralë në çdo aspekt, por qëndrojmë qartë me Perëndimin,” vuri në dukje ai.

Engelberg tha se ai mund të këshillojë të gjitha shtetet që të qëndrojnë në krah të Perëndimit, pasi nuk ka vend “në mes” tani.

“Tani është koha për të vendosur: A jemi në anën e Perëndimit apo jo? Këshilla ime për Serbinë është që të ‘orientohet drejt Perëndimit’”, ka theksuar ai.

Engelberg mbështet dhënien e një perspektive evropiane për Ukrainën, sepse, siç thotë ai, është e rëndësishme për arsye morale, solidaritet dhe mbështetje në luftën kundër Rusisë.

“Kjo nuk do të ndikojë në rrjedhën e mëtejshme të negociatave të anëtarësimit të vendeve të Ballkanit Perëndimor. Është e rëndësishme tani që edhe vendet e Ballkanit Perëndimor të solidarizohen me Ukrainën dhe të mbështesin perspektivën evropiane të atij vendi. Ecuria e negociatave për anëtarësim është diçka krejtësisht tjetër”, theksoi ai.

Engelberg kujtoi se Austria ka shumë vite që avokon që vendet e Ballkanit Perëndimor të integrohen më shpejt në BE.

“Prioriteti kryesor i politikës sonë të jashtme është Ballkani Perëndimor dhe integrimi i tij në BE. Këtë e tregojnë vizitat e vazhdueshme të zyrtarëve austriakë. Në Austri, ju keni një partner të besueshëm në rrugën drejt BE-së, i cili është i përkushtuar që vendet të pranohen sa më shpejt të jetë e mundur,” shpjegoi ai.