Kreu i Prokurorisë së Posaçme, Altin Dumani është shprehur se SPAK nuk i ka duart e lidhura për të hetuar deputetët, të cilët gëzojnë imunitet parlamentar.
Gjatë raportimit në Komisionin e Ligjeve, drejtuesi i SPAK u shpreh se është e mirëpritur çdo iniciativë për lehtësimin e hetimit, por theksoi se pengesat janë të pakta.
Altin Dumani nënvizoi se heqja e kufizimit të kontrollit do të ishte lehtësim për punën e prokurorëve të posaçëm.
“Lidhur me imunitetin parlamentar ne zbatojmë dispozitat aktuale, është e mirëpritur çdo iniciativë për lehtësimin apo heqjen e atyre pak pengesave, sepse duhet të jemi realistë pak pengesa kemi sa i përket çështjes së imunitetit. Ne jemi të lirë të hetojmë dhe kjo është gjëja më e madhe që është arritur.
Nuk i kemi duart e lidhura për të hetuar një person që ka imunitet. Momenti tjetër është ai i kontrollit dhe arrestimit. I mirëpritur nga ana jonë ndoshta do të ishte lehtësimi nëpërmjet të paktën heqjen e kufizimit që ka të bëjë me kontrollin. Është mjet kërkimi prove. Për të gjetur prova duhet të kërkosh”, tha Dumani.
