Kreu i Organizatës Botërore të Shëndetësisë (OBSH) paralajmëroi se bota do të përballet me një “dështim katastrofik moral” nëse vendet e pasura kapin vaksinat kundër COVID-19 në kurriz të vendeve të varfra.
“Unë dua të jem i hapur. Bota është në prag të një dështimi katastrofik moral, çmimi i së cilës do të paguhet nga jetët dhe mjetet e jetesës në vendet më të varfra të botës “, tha Tedros Adhanom Ghebreyesus në hapjen e një takimi virtual të bordit të drejtorëve të organizatës në Gjenevë.
Ai dënoi qëndrimin “egoist” të vendeve të pasura dhe kritikoi ashpër prodhuesit e vaksinave që kërkojnë miratimin e rregullatorit në vendet e pasura, në vend se të paraqesin të dhënat e tyre në OBSH për të marrë dritën jeshile për të përdorur vaksinat e tyre globalisht.
Duke vlerësuar se aksesi i barabartë në vaksinat e koronavirusit në të gjithë botën është komprometuar, ai tha se 39 milion doza të vaksinave të koronavirusit janë dhënë vetë në 49 vende të pasura.
“Qasja e dënuar për dështim”
Ai përmendi shembullin që një vendi të varfër iu dha vetëm 25 doza.
“Jo 25 milion, jo 25,000, por vetëm 25”, tha Tedros, pa specifikuar se cili vend ishte.
Tedros vlerësoi arritjet shkencore të prodhimit të vaksinave në më pak se një vit që nga shpërthimi i pandemisë në Kinë.
Në të njëjtën kohë, ai vuri në dukje se, megjithëse disa vende japin garanci për qasje të barabartë në vaksinat, ato u japin përparësi marrëveshjeve të tyre me prodhuesit, duke rritur kështu çmimet dhe duke u përpjekur të anashkalojnë rendin.
Ai tha se 44 marrëveshje u nënshkruan në vitin 2020 midis atyre vendeve dhe prodhuesve, dhe të paktën 12 që nga fillimi i vitit.
“Kjo qasje egoiste jo vetëm që rrezikon më të varfërit dhe më të prekshmit në botë, por është gjithashtu i dënuar me dështim”, paralajmëroi ai.
