Kombet e Bashkuara (OKB) kanë bërë thirrje për lirimin e menjëhershëm të presidentit Roch Christian Kabore dhe zyrtarëve të tjerë të lartë të arrestuar nga ushtria në Burkina Faso.
Zëdhënësja e Komisionerit të OKB-së për të Drejtat e Njeriut, Ravina Shamdasani foli për grushtin e shtetit në Burkina Faso në konferencën për shtyp në Zyrën e OKB-së në Gjenevë.
Duke thënë se Komisionerja e Lartë e OKB-së për të Drejtat e Njeriut, Michelle Bachelet, “dënoi thellësisht” grushtin e shtetit ushtarak në Burkina Faso, Shamdasani tha: “Ne i bëjmë thirrje ushtrisë që menjëherë të lirojë presidentin e arrestuar, Roch Marc Christian Kabore, dhe zyrtarët e tjerë të lartë. Ne po bëjmë thirrje për një kthim të shpejtë në rend kushtetues”.
Shamdasani theksoi se do të vazhdojnë të monitorojnë gjendjen e të drejtave të njeriut në vend.
– Grusht shteti në Burkina Faso
Në Burkina Faso, një grup ushtarësh morën pushtetin të dielën, më 23 janar, dhe lexuan një deklaratë për grusht shteti në televizionin shtetëror RTB.
Deklarata u lexua nga kapiteni Kader Ouedraogo në emër të grupit që e quan veten “Lëvizja Patriotike për Çlirim dhe Restaurim (MPSR)”. Ouedraogo tha se qeveria e presidentit Roch Christian Kabore ishte rrëzuar dhe nënkoloneli Paul-Henri Sandaogo Damiba është lideri i MPSR-së.
Presidenti Roch Christian Kabore, i cili u arrestua nga ushtria, dha dorëheqjen nga posti i tij të hënën, më 24 janar.
– Problemi i terrorizmit
Vdekja e shumë ushtarëve në sulmet e fundit në Burkina Faso ka qenë temë e debatit publik.
Për dorëheqjen e Kabores u zhvilluan protesta mbarëkombëtare, i cili u kritikua për dështimin e tij në luftën kundër terrorizmit.
Grupet terroriste të lidhura me Al-Kaedën dhe Daesh-in në Malin fqinj që nga viti 2015 kanë kryer sulme të shpeshta në veri dhe lindje të Burkina Fasos.
