Sipas të dhënave të Kombeve të Bashkuara (OKB), të paktën 75 mijë palestinezë janë zhvendosur për shkak të sulmeve të vazhdueshme izraelite në Gaza.
Zëdhënësi i Zyrës së OKB-së për koordinimin e çështjeve humanitare, Jens Laerke, për AA tha se situata e përgjithshme mbetet alarmante. Ai bëri thirrje për një pauzë humanitare derisa të arrihet një armëpushim për të siguruar hyrjen e ekipeve të ndihmës humanitare dhe shpërndarjen e sigurt të furnizimeve të ndihmës në Gazën e bllokuar.
Ai tha se nga numri i përgjithshëm i palestinezëve të zhvendosur, 47 mijë u strehuan në 58 shkolla që i përkasin Agjencisë së OKB-së për Refugjatët Palestinezë (UNRWA) në Lindjen e Afërt.
Sipas të dhënave të Ministrisë palestineze të Shëndetësisë, nga sulmet ajrore izraelite që filluan më 10 maj në Rripin e Gazës janë vrarë të paktën 227 palestinezë, përfshirë 64 fëmijë dhe 38 gra. Izraelitët kanë shënjestruar qendra shëndetësore, zyra të medias dhe lagje të banuara.
Tensionet e fundit që filluan nga Kudsi Lindor gjatë muajit të Ramazanit u përhapën në Gaza si pasojë e sulmeve izraelite ndaj besimtarëve muslimanë në xhaminë Al-Aksa dhe në lagjen Sheikh Jarrah.