Franca dhe Arabia Saudite do të mbledhin dhjetëra udhëheqës botërorë të hënën për të siguruar mbështetje për një zgjidhje me dy shtete, me disa që pritet të njohin zyrtarisht një shtet palestinez – një veprim që mund të provokojë një reagim të ashpër izraelit.
Izraeli dhe Shtetet e Bashkuara do të bojkotojnë samitin, tha ambasadori izraelit në OKB, Danny Danon, duke e përshkruar ngjarjen si një “cirk”.
“Ne nuk mendojmë se është e dobishme. Ne mendojmë se në fakt shpërblen terrorizmin”, u tha ai gazetarëve të enjten, pasi një numër vendesh e njohën Palestinën si shtet të pavarur.
Britania e Madhe, Kanadaja, Portugalia dhe Australia njoftuan të dielën se njohën zyrtarisht shtetin e Palestinës, dhe gjashtë vende të tjera – Franca, Belgjika, Luksemburgu, Malta, San Marino dhe Andorra – do të ndjekin shembullin të hënën, përpara se udhëheqësit botërorë t’i drejtohen Asamblesë së Përgjithshme të OKB-së.
Kryeministri izraelit Benjamin Netanyahu dhe qeveria izraelite e kanë hedhur poshtë njohjen, si dhe idenë e shtetësisë palestineze, dhe janë zotuar të përgjigjen pas kthimit të tyre nga OKB-ja. Disa ministra qeveritarë si Bezazel Smotrich dhe Itamar Ben Gvira po shtyjnë për aneksimin e pjesëve të Bregut Perëndimor si përgjigje.
Arabia Saudite ka paralajmëruar se aneksimi i Bregut Perëndimor do të kishte “implikime të mëdha”. Emiratet e Bashkuara Arabe, me të cilat Izraeli ka marrëdhënie, e kanë quajtur gjithashtu aneksimin një “vijë të kuqe”.
Një zëdhënës i Departamentit të Shtetit të SHBA-së i quajti njohjet “performative”, duke i thënë AFP-së në kushte anonimiteti: “Fokusi ynë mbetet në diplomaci serioze, jo në gjeste performative. Prioritetet tona janë të qarta: lirimi i pengjeve, siguria e Izraelit dhe paqja dhe prosperiteti për të gjithë rajonin që është i mundur vetëm pa Hamasin.”
Administrata amerikane ka paralajmëruar gjithashtu për pasoja të mundshme për ata që marrin masa kundër Izraelit, përfshirë kundër Francës, presidenti i së cilës Emmanuel Macron po pret samitin në Nju Jork. Jeruzalemi po shqyrton gjithashtu masa specifike dypalëshe kundër Parisit, thanë zyrtarët izraelitë.
Seanca vjen pas një ofensive tokësore izraelite në Qytetin e Gazës dhe mes perspektivave të zbehta për një armëpushim gati dy vjet pas fillimit të luftës në Gaza, e cila u shkaktua nga një sulm i Hamasit ndaj Izraelit më 7 tetor 2023.
Vendet perëndimore që njohin një shtet palestinez kanë përmendur një ndjenjë në rritje urgjence për të vepruar tani përpara se ideja e një zgjidhjeje me dy shtete të humbasë përgjithmonë.
Asambleja e Përgjithshme këtë muaj miratoi një deklaratë shtatë faqesh që përshkruan “hapa të prekshëm, të kufizuar në kohë dhe të pakthyeshëm” drejt një zgjidhjeje me dy shtete, ndërsa dënon Hamasin dhe bën thirrje për dorëzim dhe çarmatim.
Mahmoud Abbas dhe dhjetëra zyrtarë palestinezë nuk do të marrin pjesë personalisht në konferencë. SHBA-të, një aleat i fortë i Izraelit, kanë refuzuar t’u lëshojnë viza, dhe Abbas është planifikuar të shfaqet nëpërmjet videos.
Princi i Kurorës Saudite Mohammed bin Salman nuk do të marrë pjesë pavarësisht se është bashkë-organizator. Të premten, Asambleja e Përgjithshme ra dakord me konsensus, pa votim, që ai të mund të paraqitej nëpërmjet videos në takimin e së hënës.
“Bota po flet me zë të lartë për një shtet palestinez dhe ne duhet ta materializojmë atë. Tani ata duhet të tregojnë se cilat janë këto masa”, u tha gazetarëve të dielën ministri i Jashtëm i Autoritetit Palestinez, Varsen Aghabekian Shahin. /tesheshi.com/