Ka përfunduar takimi i opozitës parlamentare me ambasadoren Yuri Kim.
Në një deklaratë për mediat, kryetari i grupit Demokrat në Kuvend, Myslim Murrizi deklaroi se i paraqitën ambasadores qëndrimin përkatës.
Ai tha se vota e tyre në Kuvend do të jetë kundër kësaj marrëveshje, pasi nuk janë plotësuar tre kushtet e tyre.
“Një takim miqësor ku në emër të tre grupeve shprehëm qartë votën tonë kundër të pazarit të atyre që kanë marrë peng zgjedhjet.
U thamë nuk votojmë asnjë lloj pazari. E bëmë të qartë që opozita parlamentare nuk do e votojë në Kuvend. Ajo dakordësi për reformën nuk do marrë kurrë 39 votat e opozitës. Qëndrimi ynë është i palëkundur, nuk kërkojmë asgjë veç asaj që kemi kërkuar.
Opozita ka kërkuar votën e emigrantëve, depolitizimin dhe listat e hapura”, u shpreh Murrizi.
Më herët, në një postim në Facebook, Murrizi e cilësoi firmosjen me konsensus të draftit të Reformës Zgjedhore si një pazar të pistë.
