Një shpërthim bombe në një hotel luksoz në qytetin Quetti të Pakistanit ka vrarë katër persona dhe plagosur 11 të tjerë.
Dyshohet se shënjestra e sulmit në parkingun e hotelit Serena ishte Nong Rong, ambasadori kinez në Pakistan, raporton BBC.
Ambasadori Rong ishte në Quetta, kryeqyteti i provincës Balochistan afër kufirit me Afganistanin, por në atë kohë nuk ishte në vendin e ngjarjes.
“Një makinë e plotë me eksploziv shpërtheu në parkingun e hotelit,” tha ministri i Brendshëm pakistanez, Sheik Rashid Ahmad.
Forcat e sigurisë arritën në hotel dhe askush nuk u lejua të afrohej në vendin e shpërthimit. Pamjet në lajmet lokale tregojnë makina në flakë dhe një zjarr të furishëm në parkingun e hotelit, ndërsa policia tha se ata kishin hapur një hetim.
Hotel Serena është më i famshmi në Quetta dhe njihet si një vend i zgjedhur nga zyrtarë të qeverisë dhe zyrtarë të shquar.
Talibanët morën përgjegjësinë për sulmin pa dhënë detaje. Në muajt e fundit, organizatat militante kanë shtuar sulmet në zonat fisnore pranë kufirit me Afganistanin. Balochistani është vendi i një kryengritjeje të përhershme separatiste.
Militantët po kërkojnë pavarësi nga pjesa tjetër e Pakistanit dhe kundërshtojnë projektet kryesore të infrastrukturës kineze në zonë.
Huge Blast in Serena Hotel #Quetta pic.twitter.com/2EeFvD3LJ9
— Adeel Ahsan (@syedadeelahsan) April 21, 2021
