Detaje të reja kanë dalë në dritë nga aksioni i SPAK në jug të vendit, ku gjatë hetimeve për një grup droge, kanë dalë në përgjime dhe disa zyrtarë siç ishte prokurori Sali Hasa, punonjësi i OPGJ-së Napolon Hodaj, arbitri Qerim Ruçi, dhe një zyrtar i klubit të Përmetit Bledar Hajredini, të dyshuar për korrupsion.
Mësohet se të 6-të personat e arrestuar janë pjesë e hetimeve të ndryshme, ku në rastin e prokurorit Hasa, e motra e një personi të arrestuar i ka shkuar në zyrë dhe i ka dhënë rryshfet. Emri i të pandehurit është Emiljano Mirani, i cili është arrestuar po ashtu me urdhër të SPAK.
Ishte motra e Miranit, Elsona Papa, ajo që i shkoi në zyrë Hasës dhe i dha para për lirimin e të vëllait, ku prokurori pushoi akuzën e plagosjes së lehtë me dashje.
Ndërkohë që sa i takon oficerit të policisë gjyqësore Napolon Hodaj, ai mësohet se ka ndikuar në lirimin nga akuzat të një personi, që sot është shpallur në kërkim policor, për vepra të rënda penale.
Nga ana tjetër të gjithë personat e arrestuar që kanë lidhje me sportin, pëfshirë arbitrin apo zyrtarin e klubit sportiv të Përmetit, ata dyshohen për fiksim të ndeshjeve në tavolinë.
Më konkretisht ndeshja e cila është fiksuar prej tyre është ajo ndërmjet Selenicës dhe Përmetit, e cila është fituar nga këta të fundit përmes penalltive. Hetimet për grupin e trafikur të drogës, dhe personave të implikuar vijojnë ende, ndërsa FNSH po kryen kontrolle në banesat e të arrestuarve në Sarandë.
Në rast se do të gjenden para të pajustifikuara, padyshim që ndaj tyre do të shtohen dhe akuza e fshehjes së ta ardhurave, përveç akuzës së ngritur për korrupsion.
NJOFTIMI I PLOTË I SPAK:
Prokuroria e Posaçme Kundër Korrupsionit dhe Krimit të Organizuar ka kryer hetime në kuadër të procedimit penal nr.102/2 të vitit 2020, për veprat penale të “Trafikimit të narkotikëve”, kryer në bashkëpunim, në kuadër të grupit të strukturuar kriminal, “Grup i strukturuar kriminal”, “Korrupsioni pasiv i gjyqtarëve, prokurorëve dhe funksionarëve të tjerë të drejtësisë”, “Ushtrimit të ndikimit të paligjshëm ndaj personave që ushtrojnë funksione publike” etj, parashikuar nga nene 245/1, 319/ç, 28/4, 283/a, 333/a, 334 etj, të Kodit Penal.
Hetimi i këtij procedimi penal u bë i mundur falë bashkëpunimit shumë efektiv me Drejtorinë e Përgjithshme të Policisë së Shtetit. Në funksion të hetimeve të këtij procedimi penal janë përdorur mjete dhe metoda speciale hetimi të kombinuara këto me mjetet apo metodat tradicionale të hetimit.
Nga ky hetim u grumbulluan prova të mjaftueshme të cilat krijuan dyshimin e arsyeshëm se jemi para veprave penale të korrupsionit pasiv të prokurorëve, sipas nenit 319/ç të Kodit Penal. Gjithashtu, nga hetimet u evidentuan të dhëna edhe në lidhje me një vepër penale tjetër siç është ajo e e “Paracaktim i rezultateve në garat sportive”, parashikuar nga neni 197/a/2 i Kodit Penal.
Me kërkesë të Prokurorisë, Gjykata e Posaçme e Shkallës së Parë Për Korrupsionin dhe Krimin e Organizuar me vendimin nr.40 datë 17.06.2021 ka caktuar masat e sigurimit arrest në burg për shtetasit:
Sali Hasa, prokuror në Prokurorinë Pranë Gjykatës së Shkallës së Parë Sarandë, i dyshuar për kryerjen e veprës penale të “Korrupsioni pasiv i gjyqtarëve, prokurorëve dhe funksionarëve të tjerë të drejtësisë”, parashikuar nga neni 319/ç i Kodit Penal.
Napolon Hodaj, Oficeri i Policisë Gjyqësore në Prokurorinë Pranë Gjykatës së Shkallës së Parë, Sarandë, i dyshuar për kryerjen e veprës penale të “Ushtrim i ndikimit të paligjshëm ndaj personave që ushtrojnë funksione publike”, parashikuar nga neni 245/1 paragrafi i dytë i Kodit Penal.
Qerim Ruçi, arbitër i ndeshjeve të futbollit, si i dyshuar për kryerjen e veprës penale të “Paracaktimi i rezultateve në garat sportive”, kryer në bashkëpunim, parashikuar nga nenet 197/a/2 dhe 25 të Kodit Penal.
Bledar Hajredini, zyrtar i klubit sportiv SHS “Përmeti”, i dyshuar për kryerjen e veprës penale të “Paracaktimi i rezultateve në garat sportive”, kryer në bashkëpunim, parashikuar nga nenet 197/a/2 dhe 25 të Kodit Penal.
Julian Zera, i dyshuar për kryerjen e veprës penale të “Ushtrimi i ndikimit të paligjshëm ndaj personave që ushtrojnë funksione publike”, kryer në bashkëpunim, parashikuar nga nenet 245/1/1 – 25 i Kodit Penal.
Emiljano Mirani, i dyshuar për kryerjen e veprës penale të “Ushtrimi i ndikimit të paligjshëm ndaj personave që ushtrojnë funksione publike”, kryer në bashkëpunim, parashikuar nga nenet 245/1 – 25 i Kodit Penal.
Gjithashtu me vendimin nr.40 datë 17.06.2021 Gjykata ka caktuar masën e sigurimit “arrest në shtëpi”, për të hetuarën Elsona Papa, e dyshuar për kryerjen e veprës penale të “Ushtrimi i ndikimit të paligjshëm ndaj personave që ushtrojnë funksione publike”, kryer në bashkëpunim, parashikuar nga nenet 245/1/1 – 25 i Kodit Penal.
Kurse ndaj shtetasit Hysen Korenica (ish ekspert mjeko – ligjor), Gjykata ka caktuar masën e sigurimit personal me karakter shtrëngues “Detyrim për t’u paraqitur në policinë gjyqësore”, parashikuar nga neni 234 i K.Pr.Penale, si i dyshuar për kryerjen e veprës penale të “Ekspertim i rremë”, parashikuar nga neni 309 i Kodit Penal.
Policia e Shtetit ka ekzekutuar në datën 19.06.2021 masat e sigurimit të caktuara nga Gjykata me vendimin nr.40 datë 17.06.2021. Gjithashtu në zbatim të vendimit nr.202 datë 17.06.2021 Policia Gjyqësore Pranë Policisë së Shtetit ka ushtruar kontrolle në disa banesa dhe zyra të subjekteve të hetuar dhe të tjerë.
(E.K/Faxweb.al)
…
/faxweb
