Turqia tha të martën se sulmi në Rafah nuk do të prekë vetëm rajonin, por edhe mbarë botën, duke i bërë thirrje Izraelit që të tërhiqet menjëherë nga zona e Gazës pranë pikës kufitare Rafah, transmeton Anadolu.
“Status quo-ja në Rafah dhe në pikën kufitare duhet të rivendoset pa vonesa të mëtejshme,” tha në mediat sociale zëdhënësi i Ministrisë së Jashtme turke Oncu Keceli, duke shtuar “Sulmi në Rafah do të godasë jo vetëm rajonin por të gjithë botën. Izraeli duhet menjëherë të tërheqë forcat e saj nga ana e Gazës në pikën kufitare Rafah”, tha Keceli.
Pasi Hamasi ra dakord për një propozim armëpushimi në Gaza, sulmi izraelit në Rafah tregon se qeveria izraelite e Benjamin Netanyahu nuk ka “qëllime të mira”.
Ushtria izraelite tha herët të martën se forcat e saj kishin marrë nën kontroll anën palestineze të kalimit kufitar Rafah.
Pas njoftimit të grupit palestinez Hamas për pranimin e propozimit kataro-egjiptian për armëpushim në Gaza, kabineti izraelit i luftës vendosi të vazhdojë operacionin në Rafah me qëllim që të ushtrojë, siç theksoi, “presion ushtarak ndaj Hamasit për të çuar përpara lirimin e pengjeve dhe objektiva të tjera të luftës”.
Ushtria izraelite lëshoi një urdhër urgjent për evakuimin e palestinezëve në lagjet lindore të Rafah dhe u bëri thirrje atyre që të zhvendosen në qytetin Al-Mawasi në Gazën jugore.
Rafah është shtëpia e më shumë se 1.5 milionë palestinezëve të zhvendosur që ikën nga lufta e nisur nga Izraeli pas një sulmi të 7 tetorit nga Hamasi.
Që atëherë, sulmet izraelite kanë vrarë më shumë se 34,700 palestinezë, kryesisht gra dhe fëmijë, dhe kanë shkaktuar një katastrofë humanitare.
