Numri në rritje i rasteve të koronavirusit në Evropë së shpejti mund të sjellë shumë spitale në kufirin e fundit të mbingarkesës, njoftoi Organizata Botërore e Shëndetësisë (OBSH).

Javën e kaluar, numri i rasteve të raportuara të koronavirusit në Evropë ishte pothuajse tre herë më i lartë se në kulmin e pandemisë në valën e parë në mars, tha udhëheqësi i OBSH-së Tedros Adhanom Ghebreyesus në një konferencë shtypi në Gjenevë.

Por numri i të vdekurve nga COVID-19 ishte shumë nën nivelet e marsit, shtoi ai.

Sidoqoftë, njeriu i parë i OBSH paralajmëroi se “numri i shtrimeve në spital po rritet dhe në shumë qytete ata raportojnë se do të plotësojnë kapacitetet për kujdes intensiv brenda disa javësh”.

Sezoni i gripit

Kjo tendencë shqetëson OBSH pasi sezoni i gripit në hemisferën veriore do të rrisë gjithashtu nevojën për shtretër spitalorë.

Ghebreyesus tha se shtetet duhet të miratojnë një qasje të unifikuar ndaj COVID-it dhe gripit, pasi të dy sëmundjet mund të mposhten nga e njëjta strategji – distanca, duart e pastra, maskat dhe hapësirat e ajrosura mirë.

Meqenëse nuk ka vaksina të mjaftueshme të gripit në disa vende, OBSH rekomandon që profesionistëve të shëndetit dhe të moshuarve t’u jepet përparësi.