Komiteti i posaçëm i Parlamentit të BE-së kundër përgjimit të paligjshëm i kërkoi policisë evropiane të nisë hetime për përdorimin shtetëror të softuerëve të spiunazhit (spyware) kundër qytetarëve në katër shtete të BE-së, përfshirë Greqinë, pasi autoritetet përkatëse hezitojnë të veprojnë.
Jeroen Lenaers, kryetar i Komitetit Hetues i Parlamentit Evropian, i dërgoi një letër drejtorit ekzekutiv të Europolit, për të hetuar përdorimin e Pegasus dhe softuerit të spiunazhit ekuivalent të survejimit (PEGA) duke kërkuar ndihmën e agjencisë.
Letra, që mban datën 28 shtator dhe e cila u publikua sot nga komiteti PEGA, shpjegon se “ka pasur një sërë zbulimesh në lidhje me përdorimin e paligjshëm të softuerit të spiunazhit”, e cila ndër të tjera ka shënjestruar “gazetarë, politikanë, OJQ, zyrtarë publikë në Hungari, Poloni, Spanjë, Greqi dhe Komisionin Evropian”.
Megjithatë, “me kalimin e çdo dite, rreziku i zhdukjes ose shkatërrimit të provave rritet” dhe “ka shqetësime për kapacitetin dhe vullnetin e autoriteteve kombëtare që të kryejnë hetime të shpejta dhe të tërësishme”, shtoi Lenaers.
Komiteti fton Europolin të bëjë “propozim për një hetim për Shtetet Anëtare të interesuara”, bazuar në rregulloren e kohëve të fundit që lejon agjencinë të fillojë hetime për krimet që “ndikojnë në interesin e përbashkët të BE-së”.
Sipas PEGA-s, aktet e krimit kompjuterik, korrupsioni, shantazhi dhe zhvatja që janë raportuar me rastet e softuerit të spiunazhit janë brenda mandatit të Europol-it.
Komiteti i PE-së ka hetuar keqpërdorimin e softuerit survejues nga Hungaria, Polonia, Spanja dhe Greqia.
Skandali i fundit i përgjimit ka përfshirë drejtpërdrejt Parlamentin Evropian sepse shpërtheu pas ankesës së Nikos Androulakis, deputetit të BE-së dhe lider i partisë më të madhe opozitare greke, PASOK.
Androulakis iu drejtua prokurorit grek në korrik pasi u njoftua nga ekspertët e sigurisë kibernetike të PE-së se në telefonin e tij ishte zbuluar një softuer i dëmshëm (malware) – Predator.
Në gusht, kryeministri Kyriakos Mitsotakis pranoi se Androulakis ishte përgjuar, por mohoi se ai kishte njohuri për përgjimin.
Në dëshminë e tij në seancën plenare të PE-së kushtuar skandalit të përgjimeve në Greqi, Androulakis muajin e kaluar pretendoi se dosjet e tij në shërbimin e inteligjencës greke u shkatërruan ditën që ai paraqiti ankesën e tij.
Burimi: AA
