Pas arrestimit të Metës, masë edhe për Monika Kryemadhin, GJKKO vendos detyrim paraqitje ndaj deputetes, sipas burimeve jo zyrtare të gazetares së Top Channel, Anila Hoxha.
Kreu i Partisë së Lirisë, Ilir Meta, është arrestuar ditën e sotme. Burime bëjnë me dije se ish-presidenti i vendit është vendosur sot nën arrest me urdhër të SPAK.
Bëhet e ditur se Ilir Meta është ndaluar nga agjentët e BKH të asistuar edhe nga policia pranë zonës së Casa Italias, në Tiranë.
Ndërkohë, Meta kishte paralajmëruar një konferencë për shtyp mesditën e sotme, në orën 13:40, ku ishin ftuar të merrnin pjesë gazetarët.
“Në ora 13:40, Presidenti i Partisë së Lirisë, Z. Ilir Meta do të ketë një konferencë për shtyp. Ftohen të gjithë gazetarët të marrin pjesë”, thuhej në njoftimin e zyrës së shtypit të bërë në orën 12:09.
Ende nuk ka një njoftim zyrtarë nga Prokuroria e Posaçme për këtë urdhër-arrest, por kujtojmë që Ilir Meta është thirrur në SPAK për të dhënë shpjegime për një sërë çështjes.
Kreu i PL-së është paraqitur disa herë në Prokurorinë e Posaçme për t’u marrë në pyetje për çështjen CEZ-DIA.
Ilir Meta dhe Monika Kryemadhi gjithashtu janë në hetim pasuror, si edhe në lidhje me çështjen e lobimit në SHBA.