Enno Bozdo ka thënë në emisionin “Ditari” në A2 CNN se Partia Demokratike ka “ndërmarrë disa hapa që kanë lidhje me bërjen gati të strukturës për zgjedhjet e parakohshme”.
“Kemi ndërmarrë disa hapa në pritshmëritë që kemi për zgjedhjet e parakohshme, mundësisht brenda këtij viti.
Duhet të mbyllim të gjithë pjesën organizative në mënyrë që sapo të shpallet data e zgjedhjeve, partia të jetë gati me strukturën dhe infrastrukturën e saj”, tha Bozdo.
Pavarësisht pretendimeve të Bozdos se po përgatiten për zgjedhje të parakohshme, në mbledhjen e një jave më parë me “kupolën” e PD-së, Lulzim Basha tha se nuk janë gati për zgjedhje të parakohshme.
Kur u pyet nëse në javët në vijim do të ketë protesta të tjera të opozitës së bashkuar, Bozdo ndërkohë deklaroi se kjo periudhë nuk është e përshtatshme për protesta.
“Nuk do të ketë protesta tani, pasi klima e nxehtë, stina e pushimeve dhe vëmendja e larguar e publikut e bëjnë jo të efektshme organizimin e protestave.
Kjo është koha për të punuar për strukturën në mënyrë që shtatori të na gjejë gati”, theksoi Bozdo.
