Partia Demokratike kunërshton vendimin e policisë për ndalimin e protestuesve si dhe çuarjen për ndjekjen penale të 7 personave, ku ndërmjet tyre ishin dhe Sazan Guri, Klajdi Bello dhe Zaçe Islami.
Me anë të një deklarate për median, PD-ja thekson se dënon me ashpërsi përndjekjen e qytetarëve që kërkojnë kthimin e të drejtave kushtetuese, të kufizuara padrejtësisht kaq gjatë nga qeveria.
“Ngritja e zërit nga disa aktivistë, që nuk pajtohen me vendimet antikushtetuese të parlamentit ilegjitim për zgjatjen e gjendjes së jashtëzakonshme, është garanci për themelin e çdo shoqërie demokratike. Urdhrat e Edi Ramës për të përndjekur kundërshtarët e vendimeve të tij antikushtetuese e shndërrojnë Shqipërinë nga një vend kandidat për Bashkimin Europian në një vend që drejtohet prej një regjimi dhe kryeministër autoritarist”, thuhet në këtë deklaratë.
Për patinë më të madhe të opozitës “sot, qytetarëve po u cenohen të drejtat me lehtësi nga regjimi i Edi Ramës, sepse kryeministri antishtet po pengon ngritjen e Gjykatës Kushtetuese, me qëllim kontrollin politik të saj”.
“Partia Demokratike është në krah të çdo qytetari që ngre zërin për liritë dhe të drejtat, që ngre zërin për shëndetin dhe punën e tij. Asnjë vendim antikushtetues nuk mund të bëjë që Edi Rama të marrë shqiptarët peng dhe të zëvendësojë demokracinë me regjimet autoritariste”, mbyllet reagimi i PD-së.
