Ish-zëvendëspresidenti amerikan Mike Pence tha të shtunën mbrëma se po pezullon fushatën për kandidim republikan për zgjedhjet presidenciale të vitit 2024.
“Kam ardhur t’ju them se është bërë e qartë për mua: kjo nuk është koha ime,” tha Pence në një mbledhje të Koalicionit Republikan Hebre në Las Vegas.
Ai tha se “pas reflektimit dhe lutjes, vendosi të pezullojë fushatën për president”.
Mike Pence ishte nënkryetar gjatë presidencës së Donald Trump.
Pence e ndërtoi fushatën e tij mbi vlerat konservatore fetare dhe një shkëputje me Donald Trump për shkak të ngjarjeve të 6 janarit në Kapitolin e SHBA-së, ku u vërsulën mbështetësit e Trump që nuk donin të pranonin humbjen e tij në zgjedhje.
Pyetja tani është nëse Pence do t’i nxisë zgjedhësit e tij të votojnë për një kandidat tjetër.
