Supersticionet mënjanë, lëngu i majdanozit sjell përfitime për shumë sisteme të trupit, shumë prej të cilave thjesht nuk mund të injorohen.
- Forcon sistemin imunitar
Majdanozi është i pasur në apigenin, i cili ka treguar se shtyp sistemin imunitar të tej-stimuluar, duke ndihmuar në luftën kundër alergjive, çrregullimeve inflamatore autoimune dhe kronike.
Përmbajtja e tij e lartë flavonoide gjithashtu i siguron asaj aftësinë për të rritur përgjigjen e sistemit imunitar, si dhe për të shtypur faza të ndryshme të zhvillimit të kancerit .
Vetëm 1 filxhan majdanoz i sapoprerë ju siguron mbi 133% të sasisë ditore të rekomanduar për vitaminë C. Vitamina C është një antioksidant i fuqishëm, që është e mirënjohur për efektet e dobishme në sistemin imunitar.
- Trajtimi i frymës së keqe
Vuani nga halitosis (era e keqe e gojës), apo këmbët dhe sqetullat me erë? Majdanozi mund të ndihmojë! Për shkak të niveleve të larta të klorofilit, majdanozi është një aromatizues natyral. Kjo do të thotë që ndihmon në neutralizimin e erës së keqe të gojës dhe largon bakteret që shkaktojnë aromën e fortë të trupit. Ndërsa jo shumë studime kanë treguar që klorofili ndihmon në deodorizimin e trupit, një studim zbuloi se ndihmonte në uljen e erërave të trupit tek të rriturit e moshuar që jetonin në shtëpi pleqsh (azil).
Pra, mos e kapërceni atë zbukurim të majdanozit në pjatën tuaj – kjo do t’ju ndihmojë të pastroni qiellzën tuaj dhe të freskoni frymën në fund të vaktit.
- Diuretik natyral
Majdanozi është një diuretik natyral i shkëlqyeshëm, duke e bërë atë një barishte të mrekullueshme për uljen e presionit të gjakut dhe duke ndihmuar në heqjen e toksinave të tepërta nga trupi. Efektet e tij diuretike ndihmojnë në eleminimin e natriumit të tepërt në trup, i cili mund të ndihmojë në largimin e ujit të tepërt. Një studim i vitit 2002 zbuloi se majdanozi mund të ndihmojë në vëllimin urinar. Hulumtimet më të fundit gjithashtu kanë konfirmuar vetitë e tij diuretike.
Ndërsa studimi u krye tek minjtë, ai tregoi se majdanozi mund të veprojë si një ilaç anti-urolitik duke ulur sekretimin urinar të kalciumit, duke rritur pH e urinës dhe duke ulur sekretimin e proteinave urinare. Majdanozi pati aktivitet nefroprotektiv (mbrojtës i veshkave). Duke ndihmuar veshkat të nxjerrin natriumin e tepërt dhe ndotës të tjerë, shëndeti i trupit mund të përmirësohet shumë.
- Anti-inflamator
Majdanozi është një bar mahnitës anti-inflamator dhe ndihmon në sigurimin e lehtësimit tek ata që vuajnë nga artrozat dhe artriti reumatoid, por jo për shkak të vitaminës C apo beta-karotenit, sikurse pretendojnë disa, pasi një barishte erëz sado vitaminë C apo A të përmbajë, nuk arrin kurrë nivelet farmakologjike të saj. Aftësia i takon flavonoideve të tij të fuqishme në zvogëlimin e ashpërsisë së astmës, artrozës dhe artritit reumatoid. Do të duhet shumë kohë derisa natyropatët dhe ata që shkruajnë për bimët medicinale, të kuptojnë se fuqia e tyre magjike nuk është tek vitaminat apo mineralet, por tek kimikatet jo-ushqyese që përmbajnë. Përbërësit ushqyes kanë cilësi terapeutike vetëm tek ushqimet. Dhe zakonisht, tek ushqimet që mund të merren në sasi, si psh frutat dhe perimet në formën e lëngjeve të shtrydhur. Majdanozi përmban një vaj të paqëndrueshëm të quajtur eugenol që është treguar në studime të ketë veti të forta anti-inflamatore dhe anti-artritike.
- Tonik dhe pastrues gjaku
Përmbajtja e lartë e klorofilit të majdanozit ndihmon në alkalizimin e trupit, formimin e qelizave të reja të kuqe të gjakut dhe pastrimin e gjakut. Poliacetileni, një përbërje e gjetur në majdanoz, ka veti anti-trombocite-grumbulluese, që ndihmojnë në parandalimin e sëmundjeve kardiovaskulare dhe goditjes në tru.
Majdanozi gjithashtu përmban një mori flavonoidesh të dobishme, që neutralizojnë radikalet e lira dhe forcojnë zemrën. Studimet sugjerojnë, që majdanozi mund të përdoret për të trajtuar hipertensionin arterial, duke mbrojtur nga sëmundjet kardiake.
- Redukton gazrat dhe kapsllëkun
Majdanozi është përdorur si një ilaç tradicional për dhimbjet e barkut, dispepsi, kapsllëk dhe gazrat e zorrëve. Ai gjithashtu vepron si diuretik, duke ndihmuar në uljen e fryrjes së stomakut të shkaktuar nga mbajtja e ujit. Gjethet e majdanozit janë karminative, duke lehtësuar gazrat duke parandaluar formimin e gazrave në traktin gastrointestinal. Për më tepër, ato lehtësojnë dëbimin e gazit, duke zvogëluar kështu shpejt fryrjen e barkut.
Vajrat esencialë të majdanozit janë të dobishëm por nuk duhen përdorur nga brenda, ndërsa mund të konsumohen në mënyrë të sigurt përmes konsumit të majdanozit. Nëse keni të bëni me kapsllëk, ngrënia e majdanozit të gjallë ose në një sallatë do të ndihmojë shumë në lëvizjen e ushqimit pa ndonjë vështirësi.
- Forcon kockat
Përmbajtja e lartë e vitaminës K në majdanoz e bën atë një barishte të shkëlqyeshme për të ndihmuar në forcimin e kockave. Me të vërtetë nëse është kampion në ndonjë vitaminë, kjo është vitamina K. Dhe nëse ka ndonjë ushqim kampion në këtë vitaminë, prapë ky është majdanozi. Mungesa e vitaminës K ka qenë e lidhur me rrezik më të lartë të frakturave të kockave dhe osteoporozës. Kjo sepse punon me Vitaminën D për të rregulluar prodhimin e osteoklasteve dhe ndihmon në rregullimin e qarkullimit të kockave. Konsumimi i mjaftueshëm i vitaminës K përmirëson thithjen e kalciumit, zvogëlon sekretimin urinar të kalciumit dhe modifikon proteinat e matricës kockore, të gjitha këto ndihmojnë në përmirësimin e shëndetit të kockave. Majdanozi gjithashtu përmban apigenin, një flavonoid magjik për shëndetin në tërësi por edhe për kockat, pasi ky flavonoid nxit rritjen e osteoblasteve dhe rrit kolagjenin në qelizat e kockave.
Kush e dinte që një garniturë e zakonshme në pjatat tona mund të bënte aq shumë për kockat tona!
- Parandalon infeksionet e fshikëzës urinare
Duke vepruar si një diuretik natyral, lëngu i majdanozit ndihmon në largimin e baktereve të këqija në traktin urinar, që mund të shkaktojnë infeksione të traktit urinar (UTI). Majdanozi është një
barishte antibakteriale, duke e bërë atë të shkëlqyeshme për të hequr infeksionet bakteriale në fshikëzën dhe traktin urinar. Në mënyrë të veçantë, majdanozi është treguar të ketë aktivitet antibakterial kundër Escherichia coli, Staphylococcus saprophyticus dhe Klebsiella spp., të cilat janë patogjenët më të zakonshëm të UTI-ve. U gjet gjithashtu efektiv kundër Listeria monocytogenes, Salmonella enterica, Enterobacter cloacae dhe Pseudomonas aeruginosa.
Përbërjet e tjera që gjenden brenda majdanozit, si karotenoidet dhe kumarina, gjithashtu mendohet se rrisin vetitë e tij antibakteriale duke rritur imunitetin dhe prishin replikimin e ADN-së në shtame të dëmshme bakteriale.
- Shëron Veshkat
Lëngu i majdanozit vepron si një diuretik natyral, kështu që ndodh të jetë një nga bimët më të mira për shërimin e veshkave. Dy përbërës janë përgjegjësit – apioli dhe myristicina. Një studim i vitit 2017 arriti në përfundimin se “majdanozi vepron si ilaç anti-urolitik përmes uljes së sekretimit urinar të kalciumit, rritjes së pH të urinës, diurezës, zvogëlimit të sekretimit të proteinave urinare dhe përmes aktivitetit të saj nefroprotektiv”.
Lëngu i 2 tufave majdanoz çdo ditë (së bashku me selino, kastravec, limon dhe xhenxhefil), zhdukin natyrshëm infeksionin urina për 5 ditë.
- Ndihmon tretjen
Majdanozi stimulon oreksin dhe përmirëson procesin e tretjes. Ai përmban një mori enzimash të ndryshme që ndihmojnë në prishjen e ushqimit gjatë tretjes, si dhe vitamina, minerale dhe fitonutrientë të tjerë që ndihmojnë në përthithjen dhe përdorimin e ushqimeve të tjera që hamë. Një enzimë në majdanoz e quajtur anhidrazë karboni luan një rol kryesor në rregullimin e pH dhe ekuilibrit të lëngjeve në pjesë të ndryshme të trupit tonë. Në mukozën e stomakut, kjo enzimë luan një rol në sekretimin e acidit, mund të ndihmojë në rregullimin e paaftësisë për të tretur grimcat e ushqimit Ndihmon gjithashtu për t’i bërë alkaline lëngjet e pankreasit dhe pështymën tonë neutrale.
Majdanozi gjithashtu ndihmon në stimulimin e veshkave, duke prodhuar më shumë urinë dhe duke nxjerrë ujin e tepërt nga barku. Si rezultat, ndihmon në lehtësimin e shqetësimit dhe dispepsisë.
- Parandalon Aneminë
Majdanozi përmban dyfishin e sasisë së hekurit që gjendet në spinaq. Hekuri është përbërësi bartës i oksigjenit në qelizat e kuqe të gjakut dhe ndihmon në parandalimin e anemisë me mungesë hekuri.
Studimet kanë treguar se gjethet e majdanozit kanë veti antianemike. Si një përfitim i shtuar, majdanozi gjithashtu ndodh të jetë i pasur me vitaminë C, e cila në vetvete ndihmon thithjen e hekurit në trup.
Vetëm 1 filxhan majdanoz siguron 3.7 mg hekur ose 21% të konsumit tuaj të rekomanduar ditor! Pra, nëse pini lëng rreth 2 gota majdanoz të freskët (që është rreth 1 tufë majdanoz), rreth 80-90 gr majdanoz, do të merrni gati gjysmën e konsumit të rekomanduar të hekurit.
- Barishte kundër kancerit
Duke marrë parasysh të gjitha përfitimet e lëngut të majdanozit, luftimi i kancerit është në krye të listës.
Majdanozi përmban përbërësin apigenin, i cili rrit nivelet e dy enzimave të quajtura glutathione reduktaza dhe superoksid dismutaza. Këto enzima janë zbuluar se zvogëlojnë disa tumore të kancerit të gjirit. Në një përmbledhje të botuar në revistën Cell & Bioscience, autorët vërejnë se “Apigenin u raportua të shtypte kancere të ndryshme njerëzore in vitro dhe in vivo nga efekte të shumta biologjike, të tilla si shkaktimi i apoptozës qelizore dhe autofagia, duke shkaktuar arrestimin e ciklit qelizor, shtypjen e migrimit të qelizave dhe pushtimit, dhe stimulimin e një përgjigje imune ”.
Përveç apigeninës, majdanozi përmban disa përbërës të vajit të paqëndrueshëm si myristicin, limonene, eugenol dhe alfa-thujene. Këto vajra esencialë rrisin sistemin imunitar, duke ngadalësuar kështu rritjen dhe formimin e kancerit dhe duke mbrojtur nga stresi oksidativ.
- Rregullon presionin e gjakut
Majdanozi është një diuretik, që do të thotë se rrit sasinë e lëngjeve që veshkat duhet të heqin qafe për një periudhë më të shkurtër kohe. Kjo do të thotë që nëse keni tendencë të hani shumë natrium, këto nivele gjithashtu do të ulen aq më shumë kur urinoni. Sa më shumë që urinoni dhe hiqni natriumin e tepërt nga trupi, aq më i mirë do të jetë presioni juaj i gjakut. Por kjo nuk është e vetmja arsye që majdanozi ndihmon në rregullimin e presionit të gjakut. Majdanozi është i pasur me karotenoide, të cilat është zbuluar se japin përfitime për shëndetin e zemrës. Një nga mënyrat për ta bërë këtë është duke përmirësuar presionin e lartë të gjakut dhe nivelet e kolesterolit LDL (të keq). Majdanozi është gjithashtu i pasur me nitrate, të cilat ndihmojnë në zgjerimin e enëve të gjakut. Kjo, nga ana tjetër, përmirëson rrjedhën e gjakut dhe ul presionin e lartë të gjakut.
- Përmirëson vizionin *shikimin
Majdanozi është një burim jo i mirë por i shkwlqyer, i karotenoidit pro-vitaminë A: beta-karotenit. Ai gjithashtu përmban doza tw mwdha tw karotenoideve luteinë dhe zeaksantinë. Këto tre karotenoide janë thelbësore për shëndetin e mirë të syve dhe ndihmojnë në mbrojtjen e shikimit . Ato gjithashtu ndihmojnë në uljen e rrezikut të degjenerimit makular të lidhur me moshën (AMD), që rezulton në turbullim ose pa shikim në qendër të fushës së shikimit. Studimet madje kanë zbuluar se karotenoidet si luteina dhe zeaksanthina mund të zvogëlojnë rrezikun e AMD deri në 26%. Shndërrimi i beta-karotenit në pro-vitaminë A në trup ndihmon gjithashtu në mbrojtjen e kornesë dhe konjuktivës.
- Rregullon ciklet menstruale dhe qetëson ngërçet
Majdanozi përmban një përbërje të quajtur apiol, e cila ndihmon në rregullimin e ciklit menstrual dhe i menstruacionet më të qeta, pa dhimbje (por nuk merret gjatë tyre). Majdanozi gjithashtu mund të stimulojë kontraktimet e mitrës për të shkaktuar ardhjen e ciklit, kështu që ju nuk duhet të pini majdanoz në sasi të mëdha nëse jeni shtatzënë ose jeni duke ushqyer me gji ose jeni në ditët e ciklit menstrual, pasi shton gjakderdhjen. Disa kultura indigjene përdorin majdanozin për të ndihmuar në rregullimin e pjellorisë, pasi ai vepron si një stimulues i fuqishëm menstrual.
Marrë nga faqja e mjekut Alket Koroshi
