Kreu i Grupit Parlamentar të PS-së, Niko Peleshi, ka treguar se nuk ka pasur kontestime brenda partisë ndaj vendimit të kryeministrit Edi Rama që deputetët me më shumë se 1 mandat të renditen në listën e hapur në zgjedhjet parlamentare të 2025-ës.
Niko Peleshi u shpreh se renditja në listën e hapur nuk sjell përplasje mes deputetëve sociale, por shtoi se është një garë e shëndetshme.
“Çdo deputet apo kandidat për deputet të synojë të marrë sa më shumë mbështetje e vota që të listohet sa më lart në listë”, tha ai.
I pyetur në lidhje me vendimin e Ramës për ta hequr nga posti si ministër, Peleshi theksoi se “nuk jemi të përjetshëm”.
Pjesë nga deklarata për mediat:
Niko Peleshi: Nuk e quaj përplasje, por ka garë që është e shëndetshme, gara kryesore është me kundërshtarët politike dhe është nejrëzore që çdo deputet apo kandidat për deputet të synojë të marrë sa më shumë mbështetje e vota që të listohet sa më lart në listë, kjo është e shëndetshme, jo përplasje.
A ka patur kontestime?
Niko Peleshi: Ska patur kontestime dhe as nuk ka pse të ketë. Herën e kaluar ishte një sistem të ngjashëm, e kemi eksperiencën nga hera e kaluar, ishte garë e brendshme që çoi maksimizimin e votave.
Ju ka larguar nga posti i ministrit
Niko Peleshi: Nuk jemi të përjetshëm. Është gjëja e fundit që i intereson shqiptarëve, si e ka emrin ministri.
