Kompania farmaceutike amerikane Pfizer ka blerë kompaninë bioteknike Seagen për të zgjeruar portofolin e saj të trajtimit të kancerit.
Në një deklaratë nga Pfizer, thuhet se kompania globale e bioteknologjisë Seagen është blerë për rreth 43 miliardë dollarë në vlerë operative, ose 229 dollarë para në dorë për aksion.
Shtohet se blerja është miratuar nga Bordet e Drejtorëve të të dyja kompanive.
Siç thuhet në njoftim, pritet që pas blerjes së kompanisë Seagen, të ardhurat e Pfizer të rriten me më shumë se 10 miliardë dollarë në vitin 2030.
Një traditë e pasur
Pfizer aktualisht ka një portofol prej 24 ilaçesh novatore të miratuara për kancerin, duke përfshirë barnat dhe trajtimet më të shitura për kancerin e gjirit dhe prostatës.
Në njoftim thuhet se me blerjen e Seagen, Pfizer ka forcuar ndjeshëm pozicionin e saj në këtë fushë.
Pfizer është një korporatë shumëkombëshe farmaceutike dhe bioteknologjike amerikane me seli në Manhattan. Kompania u themelua në vitin 1849 në New York nga dy sipërmarrës gjermanë, Charles Pfizer dhe kushëriri i tij Charles F. Erhart.
Pfizer zhvillon dhe prodhon barna dhe vaksina për imunologji, onkologji, kardiologji, endokrinologji dhe neurologji.
