Dy persona janë arrestuar lidhur me një ngjarje të ndodhur gjatë një feste në Tiranë, ku mbetën të plagosur me armë zjarri aksidentalisht tre të rinj.
Policia bën me dije se në pranga kanë përfunduar shtetasit me iniciale A. D., 38 vjeç, dhe D. Z., 35 vjeç, për veprën penale “Veprime që pengojnë zbulimin e së vërtetës”, kryer në bashkëpunim.
Sipas bluve, persona të fjalë i kanë marrë armën e zjarrit autorit të plagosjes, shtetasit me iniciale E.E., dhe më pas e kanë fshehur atë, me qëllim pengimin e zbulimit të veprës penale dhe të autorit të saj.
“Gjatë kryerjes së veprimeve procedurale, si dhe këqyrjes së kamerave të sigurisë, është bërë e mundur gjetja e armës së zjarrit pistoletë TT, e cila dyshohet se është përdorur gjatë ngjarjes”, thuhet në njoftim.
Ndërkohë, autori është ende në kërkim, për veprën penale “Plagosja e rëndë me dashje”.
Njoftimi i policisë
Në vijim të informacionit paraprak të dhënë mëngjesin e sotëm, ju informojmë se:
Në vijim të veprimeve të shpejta hetimore, nga Sektori për Hetimin e Krimeve të Rënda në DVP Tiranë, është bërë i mundur dokumentimi i plotë i autorësisë së ngjarjes, dhe si rezultat:
– u shpall në kërkim shtetasi E. E., 32 vjeç, për veprën penale “Plagosja e rëndë me dashje”, parashikuar nga neni 88/2 i Kodit Penal;
– u arrestuan shtetasit A. D., 38 vjeç, dhe D. Z., 35 vjeç, të dy banues në Tiranë, për veprën penale “Veprime që pengojnë zbulimin e së vërtetës”, kryer në bashkëpunim, parashikuar nga neni 301/25 i Kodit Penal.
Gjithashtu, gjatë kryerjes së veprimeve procedurale, si dhe këqyrjes së kamerave të sigurisë, është bërë e mundur gjetja e armës së zjarrit pistoletë TT, e cila dyshohet se është përdorur gjatë ngjarjes.
Pas kryerjes së krimit nga shtetasi E. E., dy të arrestuarit, i kanë marrë armën e zjarrit dhe më pas e kanë fshehur atë, me qëllim pengimin e zbulimit të veprës penale dhe të autorit të saj.
Materialet i kaluan Prokurorisë.
