Gazetari Artan Hoxha ka zbuluar rolin që ka pasur Behar Sofia, i cili u ekzekutua mëngjesin e sotëm në Tiranë, në vrasjen e 4 punonjësve të Policisë nga Dritan Dajti, që ndodhi në vitin 2009.
Hoxha shprehet se në vendin ku u vranë 4 policët në Durrës, ka qenë i parkuar mjeti i Sofisë, i cili nuk u ndaluar kurrë nga Policia, e ku brenda të cilit dyshohej se mbaheshin thasë me euro
Hoxha shprehet se me atentatin e sotëm, i cili sipas tij u krye me një gjakftohtësi kirurgjikale, vendi ka humbur mundësinë për të pyetur dëshmitarin që mund të zbardhte me prova dhe me detaje, implikimin e kupolës së Policisë së Shtetit në trafikun ndërkombëtar të drogës dhe në krimin e organizuar.
Postimi i plotë i Hoxhës:
Thjeshte nje episod nga arkiva… Me në fund Benzi me targa TR 1638 S, doli nga erresira…
Por per fat te keq, humbem mundesine e fundit për te zbardhur te verteten e ekzekutimit te 4 Dëshmorëve të Atdheut, Fatos Xhani, Kastriot Feska, Saimir Duçkollari e Altin Dizdari, pjestare te skuadres operacionale te Policise se Shtetit.
Deshmitari kyç i masakres se 7 gushtit 2009, njeriu qe mund te zbardhte me detaje dhe prova, deri ku kreret e kupoles se Policise se Shtetit ishin implikuar me krimin e organizuar dhe narkotrafikun nderkombetar, nuk jeton me…
Atentati i sotem, me gjakftohtesi kirurgjikale, në zonen me te mbrojtur te kryeqytetit, me shume sesa ekzekutimi i nje personazhi mjaft të rendesishem të botes se krimit gjate 30 viteve të postkomunizmit, eshte nje mesazh i qarte se askush dhe në asnje cep të Tiranes, nga Rolling Hills deri te Kodra e Diellit, nuk eshte i paprekshem….
Po huazoj batuten e atyre të “Rruges se Elbasanit”…
“Kush e ka rradhen”…
Në foto 1)-Benzi qe nuk u ndalua kurre nga policia dhe u zhduk pa gjurme pas masakres se 7 gushtit 2009 në Durres.
Në foto 2)-Skena e plote e masakres se 7 gushtit 2009 në nje foto të vetme.
Në të djathte Tuaregu i zi me deren e pasagjerit hapur, objektiv i operacionit top sekret, pas tij dy veturat Ford të skuadres operacionale.
Në toke trupat e Deshmoreve të Atdheut, qe nuk kane marre kurre drejtesi për ate qe ndodhi. Në të majte, Benzi me targa TR 1638 S, i viktimes se atentatit te sotem qe po dorezonte nje thes te rende me euro…
Behar Sofia, 66-vjeç u ekzekutua mëngjesin e sotëm në zemër të Tiranës, në afërsi të Piramidës, ndërsa dyshohet se atentati i tij ka qenë i mirëmenduar, pasi është përdorur armë me silensiator.
Sofia, me origjinë nga Berati, dhe banues në Tiranë pranë “ETC”, nuk është një emër i panjohur për Policinë, pasi ai dyshohet që të ketë precedentë penalë brenda dhe jashtë vendit, ndërkohë që bizneseve të tij iu është vendosur disa herë lëndë plasëse në afërsi të stadiumit Dinamo në Tiranë.
Sofia përmendet si dëshmitar në vrasjen që tronditi vendin, ku Dritan Dajti qëlloi mbi katër punonjës të Policisë, por ky nuk është rasti i vetëm. 66-vjeçari po ashtu njihej edhe me nofkën ”padrino i drogës’, pasi dyshohet si i përfshirë në trafikimin e lëndëve narkotike, dhe ka qënë i arrestuar që prej vitit 1998 në Turqi.
Duket se vrasja e tij ka qenë në vazhdimësinë e përplasjeve të grupeve kriminale për pazaret e drogës, ndërsa së fundi biznesmeni kishte humbur mjaft terren, për shkak të konflikteve.
Burimet bëjnë me dije se viktima është Behar Sofia, ndërkohë që ai ka qenë duke ecur në këmbë në momentin që është qëlluar.
Paraprakisht flitet se shtetasi në fjalë ka qenë i përfshirë në ngjarje të tjera kriminale që kanë ndodhur në vend, dhe është me precedentë penalë.
Për shkak se është qëlluar me armë me silensiator, qytetarët kanë menduar se viktima ishte rrëzuar në trotuar, por kur kanë parë njollat e gjakut, është kuptuar që kemi të bëjmë me një ngjarje kriminale.
Kanë qenë qytetarët ata që kanë lajmëruar Policinë për qytetarin e plagosur, pasi e kanë parë të shtrirë në trotuar, ndërkohë që po punohet për identifikimin e autorëve.
Sofia ka qenë duke ecur me këmbë në momentin kur është qëlluar ndërkohë që në zonë ka shumë biznese, të cilat kanë kamera sigurie, që pritet të mundësojnë zbardhjen e ngjarjes.
Policia ka vendosur perimetrin e sigurisë në të gjithë zonën përreth, ndërkohë që në vendngjarje kanë mbërritur drejtuesit më të lartë të Policisë së Tiranës, pëtfshirë drejtuesin Rebani Jaupi.
Zona ku ka ndodhur ngjarja është mjaft e populluar, dhe në momentin kur ka ndodhur ngjarja dyshohet se ka pasur dëshmitarë që e kanë parë skenën e krimit.
Policia po vijon hetimet dhe ka ngritur disa postoblloqe në zona të ndryshme të Tiranës, në mënyrë që të arrijë drejt autorëve.
Njoftimi i Policisë për vrasjen:
Me datë 25.02.2021, rreth orës 09:00, në trotuar në afërsi të Piramadës është konstatuar nga sherbimet e Policisë shtetasi B. S., 66 vjeç, i shtrirë në tokë, dyshohet i plagosur me armë zjarri në rrethana ende të paqarta, i cili është transportuar menjëherë në spital për ndihmë mjeksore ku dhe ka humbur jetën si pasojë e plagëve të marra.
Menjëherë në vendngjarje kanë shkuar forca të shumta policie, të cilat kanë rrethuar zonën, me qëllim kapjen e autorit.
Janë ngritur pika kontrolli në të gjitha akset rrugore dhe vijon puna nga grupi hetimor, për sqarimin dhe dokumentimin e plotë të rrethanave të ngjarjes.
(E.K/Faxweb.al)
/faxweb
