Policia e Vlorës ka arrestuar dy shtetas, pasi u kapën duke transportuar 3 shtetas afganë kundrejt pagesës.
“Blutë” sekuestruan automjetin me të cilin po lëviznin shtetasit, një shumë parash dhe 2 aparate celulare.
Të arrestuarit janë të moshës, 26 dhe 28 vjeç, me banim në Vlorë dhe Durrës.
Njoftimi i policisë:
DVP Vlorë
Finalizohet një tjetër operacion për goditjen e veprimtarisë kriminale të dhënies ndihmë shtetasve të huaj, kundrejt pagesës, për kalim të paligjshëm të kufirit.
Operacioni policor i koduar “Border 11” çoi në pranga 2 shtetas që u kapën në flagrancë duke transportuar me automjet, kundrejt pagesës, 3 shtetas afganë që kishin si synim kalimin e paligjshëm të kufirit.
Sekuestrohen automjeti, një shumë parash dhe 2 aparate celulare.
Në vijim të goditjeve të njëpasnjëshme ndaj veprimtarisë kriminale të dhënies ndihmë shtetasve të huaj, kundrejt pagesës, për kalim të paligjshëm të kufirit, bazuar në informacionet e siguruara nga inteligjenca informative, është goditur një tjetër rast, në kuadër të operacionit policor të koduar “Border 11”.
Gjatë operacionit, në aksin rrugor Kuç-Vlorë, shërbimet e Policisë të DVP Vlorë kanë ndaluar automjetin ku ishin dy shtetasit shqiptare dhe 3 shtetas afganë.
Nga verifikimet ka rezultuar se shtetasi shtetasit shqiptarë po transportonin 3 shtetasit afganë, kundrejt pagesës, me qëllim që t’i ndihmonin ata për të kaluar kufirin në mënyrë të paligjshme.
Në përfundim të veprimeve procedurale u bë arrestimi në flagrancë i shtetasve 26 vjeç, banues në Vlorë dhe 28 vjeç, banues në Durrës, për veprën penale “Ndihma për kalim të paligjshëm të kufijve”, kryer në bashkëpunim.
Automjeti u sekuestrua në cilësinë e provës materiale, bashkë me 2 aparate celulare dhe një shumë parash që dyshohet se është përfituar nga kjo veprimtari kriminale.
Materialet procedurale i kaluan Prokurorisë, për veprime të mëtejshme.
