Berat – 24 Prill 2025
Drejtoria Vendore e Policisë Berat ka bërë publike disa zhvillime të fundit nga strukturat e saj në Komisariatin e Policisë Skrapar, Kuçovë dhe Berat.
🔹 Arrestim në Skrapar për armëmbajtje pa leje
Një 27-vjeçar nga Çorovoda, me inicialet Xh. M., u arrestua në flagrancë pasi u kap duke mbajtur në automjet një shkop gome pa leje. Policia vijon hetimet për rastin.
🔹 Aksident me dy të plagosura në “Rrugën e Lumit”
Një shtetas turk, M. K., 29 vjeç, po procedohet në gjendje të lirë pasi përplasi me automjet dy këmbësore: një grua 47-vjeçare, A. Gj., dhe vajzën e saj 13-vjeçare. Të dyja ndodhen jashtë rrezikut për jetën.
🔹 Hetim për vetëgjyqësi në Kuçovë
Një grua nga Durrësi, P. S., është duke u hetuar pasi ish-bashkëshorti i saj ka kallëzuar se ajo ka hyrë në mënyrë të paligjshme në pronën e tij, duke vepruar me vetëgjyqësi.
🔹 Kërkohet për vjedhje një 40-vjeçar nga Berat
Policia e Beratit ka shpallur në kërkim shtetasin M. Sh., i dyshuar për vjedhjen e një televizori në një banesë në lagjen “Çlirim”, më datë 14 prill 2025. Vijon puna për kapjen e tij.
Të gjitha materialet procedurale i janë referuar Prokurorisë së Beratit për veprime të mëtejshme ligjore.