Presidentja e Komisionit të Bashkimit Evropian (BE), Ursula von der Leyen, deklaroi se varësia nga karburantet e Rusisë është e paqëndrueshme.
Sipas lajmit të gazetës “Indian Express”, Von der Leyen mori pjesë në një takim të zhvilluar në kryeqytetin New Delhi si pjesë e Aleancës Ndërkombëtare të Energjisë Diellore, një nga nismat ndërkombëtare të Indisë.
Duke folur këtu, Von der Leyen tha: “Lufta në Ukrainë ka qenë një kujtesë e fortë për Evropën se varësia nga karburanti rus është e paqëndrueshme”.
Ajo deklaroi se kalimi në energjinë e rinovueshme të prodhuar në vend është një e mirë për mjedisin dhe një investim strategjik i sigurisë, dhe tërhoqi vëmendjen se politika energjetike është gjithashtu një politikë sigurie.
“Kjo është arsyeja pse Komisioni Evropian do të prezantojë një strategji të re diellore brenda projektit REPowerEU të BE-së muajin e ardhshëm”, tha Von der Leyen.
Duke kujtuar deklaratat e kryeministrit indian, Narendra Modi, se India duhet të jetë e pavarur në energji përpara vitit 2047, kur do të festohet 100-vjetori i pavarësisë së saj, Von der Leyen tha se shndërrimi i lëndëve djegëse fosile në energji të rinovueshme dhe të pastër është interes i përbashkët i BE-së dhe Indisë.
Von der Leyen deklaroi se India dhe BE-ja janë të vendosura në luftën kundër ndryshimeve klimatike dhe se ata e kuptojnë rëndësinë e energjisë diellore.
Presidentja e KE-së, e cila tha se moti i nxehtë dhe ngjarjet e rënda të motit u rritën në Indi dhe Evropë, u shpreh se duhet të merren masa urgjente për këtë çështje.
Duke tërhequr vëmendjen për rritjen e përdorimit të energjisë, Von der Leyen theksoi se energjia shtesë duhet të jetë e pastër dhe e gjelbër dhe për këtë nevojitet vendosmëri politike dhe investime.
Von der Leyen kujtoi se zinxhiri global i furnizimit u ndërpre për shkak të pandemisë së COVID-19.
Duke përmendur se siguria e zinxhirit të furnizimit global është bërë një çështje e rëndësishme, Von der Leyen tha se ekziston nevoja që India dhe BE-ja të bashkëpunojnë për këtë siguri.
Burimi: AA
