Kryeministri Edi Rama njofton se punimet për vënien në funksion të dy prej veprave më të rëndësishme të marrjes së ujit në lumin Mat – Mat-Kurbin dhe Mat-Lezhë – kanë hyrë në fazën përfundimtare, me procesin e kolaudimit të rrjetit ujitës që është drejt mbylljes.
Përmes një postimi në Facebook, Rama ka publikuar pamje nga faze e punimeve, teksa thotë se këto vepra ujitëse mundësojnë ujitjen e mbi 8,000 hektarë tokë bujqësore.
Vepra Mat-Kurbin do të mundësojë ujitjen e 4,500 hektarëve tokë bujqësore në territorin e Bashkisë Kurbin, duke sjellë një ndihmesë të madhe për fermerët dhe përmirësimin e prodhimit bujqësor në zonë.
Ndërkohë, rrjeti ujitës Mat-Lezhë do të furnizojë me ujë për vaditje rreth 4,000 hektarë tokë bujqësore në territorin e Bashkisë Lezhë, duke ndikuar pozitivisht në zhvillimin rural dhe rritjen e rendimentit bujqësor.
Këto investime strategjike konsiderohen një hap i rëndësishëm drejt modernizimit të infrastrukturës bujqësore dhe garantimit të qëndrueshmërisë në prodhimin e ushqimit në zonat me potencial të lartë bujqësor.
“Përfundimi i punimeve për vënien në funksion të dy veprave të rëndësishme të marrjes së ujit në lumin Mat: Mat-Kurbin dhe Mat-Lezhë, ku po finalizohet edhe procesi i kolaudimit të të gjithë rrjetit ujitës. Vepra e marrjes Mat-Kurbin mundëson ujitjen e 4,500 hektarëve tokë bujqësore në territorin e Bashkisë Kurbin, ndërsa rrjeti ujitës Mat-Lezhë furnizon me ujë për vaditje rreth 4,000 hektarë tokë bujqësore në zonën e Bashkisë Lezhë”, shkruan Rama në Facebook.