Kreu i Grupit Parlametar të Partisë Demokratike, Gazmend Bardhi është ndalur të flasë për mediat pas përfundimit të seancës plenare e cila zgjati vetëm 8 minuta dhe u votuan disa projektligje.
I pyetur në lidhje me votat e PDIU për marrëveshjen Rama – Meloni, Bardhi tha se për këtë e dha shpjegimin, Mesila Doda, ndërsa konfirmoi se Idrizi është në opozitë dhe është i mirëpritur në federatën e opozitës.
“Komunikimi im me Idrizin është i përditshëm. Kryetarja e Grupit besoj e ka dhënë shpjegimit në lidhje me këtë votë.
Një parti parlamentare në momente të caktuara mund të marrë vendime të caktuara.
Në Federatë mirëpritet secila parti edhe PDIU është po ashtu e mirëpritur” tha Bardhi.
Sa i përket ligjit për zonat e mbrojtura, Bardhi u shpreh se do të analizohet dhe do të shihet mundësia për ta çuar në Gjykatën Kushtetuese.
“Do ketë një vendim mbi aspekten e këtij projektligji dhe nëse ka fakte do të çohet në Gjykatën Kushtetuese” shtoi ai.
I pyetur nëse fakti që Basha nuk votoi sot aministinë penale e bën atë opozitar, Bardhi me ironi pyeti, nëse ishte apo jo në parlament kreu i PD-së zyrtare.
“Ishte sot në parlament? Sepse nuk e pashë. Rama zakonisht pyet për orën, por unë nuk e besoj teorinë e gjumit.
Pyeta a ishte apo jo në parlament, do duhet të shkoni të pyesni Bashën pse nuk ishte në parlament,” u shpreh Bardhi,.
