Mohsen Shekari, 23 vjeç, u dënua me vdekje me akuzën se bllokoi një rrugë në Teheran dhe sulmoi një pjesëtar të milicisë Basij gjatë një proteste.

Qeveria e Iranit vari këtë të burgosur 23-vjeçar të enjten, ekzekutimi i parë i një personi të akuzuar për përfshirje në protestat që kanë kapluar vendin në tre muajt e fundit. Ai ishte një nga 11 protestuesit që janë dënuar me vdekje deri më tani.

Shekari u arrestua më 25 shtator dhe u dënua më 20 nëntor nga Gjykata Revolucionare e Iranit, një gjykatë speciale për çështjet politike dhe të burgosurit politikë, sipas Neë York Times.

Ai u akuzua për “moharebeh”, ose për luftë kundër Zotit, një akuzë që mbart një dënim automatik me vdekje.

Ekzekutimi i tij u pa si një sinjal i qartë se qeveria po shton përpjekjet e saj për të frikësuar protestuesit që bëjnë thirrje për t’i dhënë fund sistemit të sundimit autoritar klerik që ka qenë në fuqi që nga viti 1979.

“Autoritetet iraniane kanë ekzekutuar një protestues, të dënuar me vdekje në gjyqe të shfaqjes pa ndonjë proces të rregullt”, shkroi në Tëitter Mahmood Amiry-Moghaddam, drejtor i organizatës për të drejtat e njeriut në Iran me qendër në Oslo. Ai tha se ekzekutimi duhet të përballet me “reagime të mprehta” nga bashkësia ndërkombëtare dhe se “në të kundërtën do të përballemi me ekzekutime të përditshme të demonstruesve”.

Sharyar, një protestues i cili u mbajt në burg përpara se të lirohej, tha në një seri postimesh në Tëitter se ai ishte takuar me Shekarin gjatë kohës së tij në burg. “Mohsen Shekari e donte jetën – ai priste lirinë e tij,” shkroi ai, duke e përshkruar shokun e tij të burgosur si një “djalosh paqësor” që punonte në një kafene në Teheran kur vendosi t’i bashkohej protestave. Shekari shpresonte që dënimi i tij i rëndë të zbutej në 10 vjet burg, tha Sharyar.