Në seancën dëgjimore përpara Gjykatës Ndërkombëtare të Drejtësisë (ICJ), avokatët që përfaqësojnë Afrikën e Jugut akuzuan Izraelin për gjenocid dhe deklaruan se “veprimet e tij të qëllimshme kundër popullit të Gazës dëshmojnë qëllimin e tij gjenocidal”.
Seanca dëgjimore ka filluar me kërkesat për masa të përkohshme në pretendimin e Afrikës së Jugut para Gjykatës Ndërkombëtare të Drejtësisë (ICJ) se Izraeli ka shkelur Konventën e Gjenocidit me veprimet e tij në Gaza.
Në ditën e parë të seancës, pala afrikano-jugore paraqiti në gjykatë argumentet e saj kundër Izraelit me shpjegime.
Gjyqi filloi me betimin e gjyqtarëve “ad hoc” të caktuar nga Afrika e Jugut dhe Izraeli vetëm për këtë çështje. Më vonë, shefi nëpunës Philippe Gautier lexoi kërkesat e Afrikës së Jugut për masa të përkohshme.
I pari që foli në emër të palës afrikano-jugore ishte ambasadori i këtij vendi në Holandë, Vusimuzi Madonsela, i cili tha se “mosndëshkimi i shkeljeve të përhapura të të drejtave të njeriut ka inkurajuar Izraelin për dekada të tëra”.
Adila Hassim, një nga avokatet që përfaqëson Republikën e Afrikës së Jugut, deklaroi se provat e gjenocidit janë të disponueshme në dosjen e aplikimit dhe janë regjistruar nga institucionet e OKB-së.
“Veprimet (e Izraelit) tregojnë një model sistematik të sjelljes nga i cili mund të nxirret përfundimi i gjenocidit”, përfundoi avokatja.
Duke vënë në dukje se numri i njerëzve të vrarë nga Izraeli tregon se “asnjë vend në Gaza nuk është i sigurt”, Hassim vuri në dukje se disa gazanë u vranë në zonat që Izraeli i shpalli “korridor të sigurt”.
“Izraeli vrau një numër të paprecedentë civilësh, plotësisht i vetëdijshëm se sa jetë civilësh do të kushtonte secila bombë,” tha ajo.
Nga ana tjetër, Hassim vuri në dukje se Izraeli vazhdon të bllokojë vazhdimisht ndihmën humanitare për Gazën dhe tha se nuk mund të dërgohen ushqime, veshje dhe materiale higjienike të mjaftueshme në Gaza dhe banorëve të Gazës u mohohet aksesi në ujë të pastër.
Hassim pohoi se gjenocidi nuk mund të shpallet paraprakisht, por Gjykata Ndërkombëtare e Drejtësisë mund të zbulojë gjenocidin dhe kërkoi që Gjykata të marrë masa paraprake.
Tembeka Ngcukaitobi, një tjetër nga avokatet që përfaqëson Afrikën e Jugut, tha gjithashtu se Gjykata duhet të deklarojë “ekzistencën e një kërcënimi të gjenocidit” në dritën e provave në dispozicion, jo “faktin që ka ndodhur gjenocidi” në mënyrë që të pranojë kërkesat e Afrikës së Jugut për masat paraprake.
Ngcukaitobi tërhoqi vëmendjen për pozicionin e Afrikës së Jugut për gjenocidin ndaj palestinezëve në Gaza dhe kujtoi se 15 raportues specialë të Kombeve të Bashkuara (OKB) dhe 21 anëtarë të grupit të punës të OKB-së kanë paralajmëruar gjithashtu se ajo që po ndodh në Gaza është gjenocid.
Duke kujtuar se administrata ushtarake izraelite dhe zyrtarët e qeverisë bënë deklarata duke zbuluar qëllimet e tyre gjenocidale, Ngcukaitobi tha se këta njerëz shprehën dëshirën e tyre për shkatërrimin e popullit të Gazës dhe shkatërrimin total të Gazës.
