Në 9 Qershor, parlamenti përmes forcës së kartonit do të vendosë ose jo shkarkimin e Ilir Metës nga detyra e presidentit. Tre ditë nga dalja e raportit përfundimtar mbi shkeljet kushtetuese që sipas mazhorancës qeverisëse, kreu i shtetit, bëri para dhe gjatë fushatës elektorale, konferenca e kryetarëve nuk priti gjatë për ta çuar atë për votim.

 

TAULANT BALLA

KRYETAR I GRUPIT PARLAMENTAR, PS

Kemi dakordësuar me kryetarët e tjerë të grupeve parlamentare dhe kohën në dispozicion të deputetëve për diskutimin dhe më pas për të proceduar me procedurat e shkarkimit të presidentit.

 

Për të shkarkuar Ilir Metën, socialistëve i duhen 94 vota.  Ajo nuk i ka por e shkruara tregon se vota e opozitës parlamentare është bërë njësh me atë të socialistëve, sa herë këtyre të fundit i është dashur vota e cilësuar pro. Nëse parlamenti do të votojë shkarkimin e presidentit, institucioni që do të japë verdiktin final është Gjykata Kushtetuese. Do t’i takojë asaj nëse çështja është kryesore dhe të nisë shqyrtimin jashtë radhe.

 

TAULANT BALLA

KRYETAR I GRUPIT PARLAMENTAR TE PS

Do të vlerësojë nëse shkeljet e konstatuara nga ana jonë janë shkelje të rënda kushtetuese të cilat hyjnë në parashikimet e nenit përkatës të kushtetutës për shkarkimin e presidentit. Nuk do të bëja asnjë koment për Gjykatën Kushtetuese sepse duhet të mësohemi që vendimet e gjykatave janë të formës së prerë dhe ato nuk diskutohen apo interpretohen nga politikanët.

 

Nga hetimi i aktivitetit të kreut të shtetit para dhe gjatë fushatës elektorale, në raportin përfundimtar, komisioni parlamentar hetimor për shkarkimin e presidentit arriti në konkluzionin se kreu i shteti shkeli disa herë kushtetutën.

 

Përmes intervistave televizive, deklaratave publike dhe qëndrimeve në rrjetet sociale, sipas mazhorancës, Ilir Meta ndikoi në aktet e dhunës para fushatës elektorale dhe u përfshi në të.

 

Nismës së socialistëve për ta shkarkuar, kreu i shtetit i është përgjigjur se Ilir Meta do të jetë në zyrë deri në fund të mandatit të tij, në Korrik të 2022.