Kreu i Grupit të opozitës, Gazment Bardhi ka depozituar kërkesën e tretë në Gjykatën Kushtetuese për pezullimin e procedurës parlamentare për ratifikimin e marrëveshjes mes kryeministrit Edi Rama dhe homologes italiane, Giorgia Meloni për emigrantët.
Bardhi shprehet se Partia Socialiste, pa pritur vendimin e Kushtetueses, po fut marrëveshjen me procedurë të përshpejtuar në kundërshtim me kalendarin e miratuar nga Konfrenca e Kryetarëve, ku miratimi i saj parashikohet në seancën e datës 14 Dhjetor 2023.
“Në kushtet kur shqyrtimi dhe votimi i projektligjit për ratifikimin do të kryhet pas tre ditësh, është e nevojshme që Gjykata Kushtetuese të kryejë me urgjencë shqyrtimin paraprak të kërkesës, duke vendosur kalimin e çështjes në seancë plenare, sepse këreksa i plotëson të gjitha kushtet, çka passjell pezullimin e procedurave parlamentare për ratifikimin e Protokollit”, thuhet në kërkesën e depozituar në Gjykatë.
Ndërsa më pas shton: “Ripërsërisim kërkesën tonë për pezullimin urgjent të procedurave parlamentare të ratifikimit të Protokollit ndërmjet Qeverisë së Republikës Italiane dhe Këshillit të Ministrave të Republikës së Shqipërisë, “Për Forcimin e Bashkëpunimit në Fushën e Migracionit”, sic Kushtetuta dhe Ligji detyron.”
Gazment Bardhi:
Marrëveshjet ndërkombëtare i nënshtrohen kontrollit nga Gjykata Kushtetuese përpara ratifikimit të tyre. Mazhoranca socialiste, edhe pse ka një kërkesë për kontrollin e kushtetutshmërisë, duke shfrytëzuar heshtjen e çuditshme të Gjykatës Kushtetuese, po shqyrton me procedurë të përshpejtuar marrëveshjen me Italinë dhe në kundërshtim me kalendarin e miratuar nga Koferencën e Kryetarëve parashikon miratimin e saj në seancën e datës 14 Dhjetor 2023.
Sot kam ripërsëritur për herë të tretë kërkesën drejtuar Gjykatës Kushtetuese për pezullimin e procedurës parlamentare për ratifikimin e marrëveshjes.
Gjykata Kushtetuese duhet të sillet si e tillë dhe jo i shtojcë pa vlerë e Qeverisë së Edi Ramës. Marrja në shqyrtim paraprak menjëherë e kërkesës së opozitës është detyrim që buron nga Kushtetuta dhe Ligji për Gjykatën Kushtetuese! E kundërta është atentat ndaj shtetit ligjor dhe minon përfundimisht besimit tek Gjykata Kushtetuese.
