Përveç rolit të tij si Toger Dan në filmin Forrest Gump, për të cilin u vlerësua me çmimin Oscar për Aktorin më të Mirë Mbështetës, Gary Sinise është bërë i njohur për punën e tij bamirëse, e cila kryesisht ka të bëjë me fëmijët e ushtarëve të rënë. Aktori ka themeluar fondacionin e tij “Gary Sinise Foundation”, që nga viti 2011, në përpjekjen e tij për të ndihmuar dhe mbështetur në çdo mënyrë që mundet familjet e heronjve të luftës.
Një nga veprimet e tij më të mëdha është krijimi i Programit Snoëball Express, gjatë të cilit ai udhëton me fëmijët e ushtarëve të rënë në Disneyland, plotësisht falas. 70-vjeçari paguan për biletën e tyre të avionit, aksesin në parkun argëtues, akomodimin e tyre dhe madje edhe ushqimin e tyre, duke siguruar që shqetësimi i tyre i vetëm të jetë të kalojnë mirë.
Sipas Disney Parks, ideja rrjedh nga një histori që daton që nga viti 2003, kur ushtari amerikan Jesse Givens i shkroi një letër gruas së tij para vendosjes së tij në Irak, duke shprehur dëshirën e tij që familja e tij të vizitonte parqet e Disney nëse ai nuk kthehej. Dëshira e tij u bë realitet në vitin 2006, kur familja e tij, e shoqëruar nga familje të tjera të ushtarëve të rënë, vizitoi Disneyland.
Gary Sizin u përfshi një vit më vonë, në vitin 2007, duke kënduar me Lt. Dan Band për këto familje. Dhjetë vjet më vonë, në vitin 2017, ai vendosi të merrte zyrtarisht përsipër programin dhe udhëtimi i parë në Disneyland u zhvillua në vitin 2018, me këtë traditë që vazhdon çdo vit.
Siç shkruan Gary Sinise në faqen zyrtare të fondacionit të tij: “Humbja e një prindi nuk bëhet kurrë më e lehtë. Ne mbështesim fëmijët dhe bashkëshortët mbijetues të heronjve të rënë ushtarakë dhe ndihmës të shpejtë, familjet e programit ‘Snowball Express’, përmes aktiviteteve dhe mbështetjes gjatë gjithë vitit që u kujtojnë atyre se nuk janë kurrë vetëm dhe se heroi i tyre nuk harrohet kurrë.”
Në deklaratat e dhëna për People, ai tha: “Kam takuar shumë nga këto familje. I dua dhe dua vetëm të bëj diçka për t’i ndihmuar ata ta kalojnë këtë.”
“Kur vijnë në eventin tonë, janë të rrethuar nga fëmijë dhe anëtarë të familjes që e kuptojnë plotësisht se çfarë po kalojnë. Të gjithë po kalojnë të njëjtën gjë. Dhe ne përpiqemi t’u japim shumë dashuri dhe gëzim dhe t’u ofrojmë një mjedis shërues”, shtoi ai.
Por teksa ky duket vërtet një akt human, ai përmban dhe një cinizëm të pashoq. Ata ushtarë janë vrarë gjatë pushtimit të një vendi, duke vënë në shënjestër me mijëra civilë të pafajshëm e duke shkaktuar kësisoj shumë tragjedi njerëzore. Në Irak e Afganistan kjo është bërë e qartë tashmë se ç’gjëma kanë sjellë ushtritë pushtuese nën udhëheqjen e asaj të SHBA.
Dhe këtu shtrohet pyetja: po fëmijët jetimë të atyre qindra prindërve të vrarë pa faj pse kanë mbetur jashtë “zemrës së ndjeshme” të aktorit? /tesheshi.com/
