Pas denoncimit për shpërndarjen e barnave të skaduara ndaj pacientëve me tuberkuloz, gazetari Osman Stafa ka bërë sot një reagim të dytë, ku publikon se një nga pacientët e prekur është thirrur nga Dispanceria për të tërhequr barnat e reja, por në vend të një ndjese apo sqarimi institucional, i është kërkuar llogari për denoncimin e bërë.
Sipas postimit të sotëm të gazetarit, pacientit i është bërë presion verbal lidhur me publikimin e rastit dhe jo sqarim për rrethanat e ngjarjes apo sigurinë e barnave që ai kishte marrë.
“Në vend që të kërkohet falje, i është kërkuar llogari se pse denoncoi”, shkruan Stafa, duke e cilësuar sjelljen si të papranueshme dhe skandaloze.
Rasti u bë fillimisht publik më 1 gusht 2025, ku gazetari raportoi se në Dispancerinë e Tiranës u shpërndanë ilaçe të skaduara për trajtimin e tuberkulozit. Barnat në fjalë kishin afat skadence korrikun 2025 dhe, sipas tij, janë barna spitalore të cilat nuk gjenden në farmaci, por shpërndahen nga struktura publike.
Denoncimi:
Personi i cili para pak ditëve mori ilaçe të skaduara për tuberkulozin, është telefonuar sot në mëngjes nga Dispanceria, dhe i është kërkuar të shkojë për të marrë ilaçet e paskaduara.
Ka shkuar atje, dhe në vend në një ndjese publike nga titullarja e institucionit, i është kërkuar llogari, se pse denoncove, se pse e bëre publike.
