Një orë dore Patek Philippe që ishte për një kohë të shkurtër më e shtrenjta e shitur ndonjëherë në ankand në vitin 2016 arriti një çmim të ri marramendës gjatë fundjavës në Zvicër, njoftoi dje shtëpia e ankandeve Phillips.
Ajo u shit për 14,190,000 franga zvicerane (17.6 milionë dollarë, 15.2 milionë euro). Nëntë vjet më parë, ajo ndërroi pronarë për 11 milionë franga zvicerane (11.8 milionë euro).
Patek Philippe Perpetual Calendar Reference 1518, e prodhuar në vitin 1943, është një nga vetëm katër modelet e njohura të bëra prej çeliku inox, një gjë e rrallë që e bën atë edhe më të kërkuar se orët e bëra prej ari.
Rekordi i vitit 2016 për një orë dore u thye në vitin 2017, kur një Rolex Daytona që dikur i përkiste aktorit të Hollivudit Paul Newman u shit në ankand për 17.8 milionë dollarë (15.4 milionë euro).
Më pas, në vitin 2019, Patek Philippe Grandmaster Chime u shit për 31 milionë dollarë (26.8 milionë euro).
Shitja gjatë fundjavës e bëri Reference 1518 “një nga orët më të shtrenjta në histori”, tha shtëpia e ankandeve.
Ankandi zgjati pak më pak se nëntë minuta e gjysmë dhe tërhoqi pesë ofertues. Shitja iu bë një personi që mori pjesë me telefon.
Koleksionistë, tregtarë dhe prodhues orësh morën pjesë në shitje në një dhomë në hotelin Président në Gjenevë.
Gjatë ankandit dy-ditor, 207 orë dore koleksionistësh u shitën për 66.8 milionë franga zvicerane. Kjo është shuma më e lartë e mbledhur ndonjëherë në një ankand të tillë, sipas shtëpisë. Morën pjesë 1,886 blerës potencialë nga 72 vende.