Një engjëll në një kishë në Romën qendrore është restauruar për t’i ngjarë kryeministres italiane Giorgia Meloni, raportoi një e përditshme kombëtare të shtunën.
Kjo e shtyu Ministrinë e Kulturës të niste një hetim, ndërsa Meloni e përshëndeti të gjithë rastin me të qeshura.
Një artikull kryesor në të përditshmen la Repubblica tërhoqi së pari vëmendjen për faktin se njëri nga dy engjëjt në kapelën e Bazilikës së Shën Lorencit në Lucina ishte ndryshuar për t’i ngjarë politikanes konservatore 49-vjeçare dhe kryeministres së parë femër të Italisë.
Gazeta publikoi foto të pikturës para dhe pas restaurimit, duke deklaruar se engjëlli më parë dukej si një “kerubin gjenerik”.
Ministria e Kulturës tha se i kishte urdhëruar zyrtarit më të lartë të Romës për mbrojtjen e trashëgimisë kulturore të inspektonte pikturën e restauruar në të njëjtën ditë, përpara se të vendoste për hapat e mëtejshëm, raporton Reuters.
Lëvizja Pesë Yje e opozitës reagoi me një deklaratë ku thuhej:
“Nuk mund të lejojmë që arti dhe kultura të bëhen një mjet propagande ose diçka e tillë, pavarësisht se fytyra e kujt është paraqitur, edhe nëse është fytyra e kryeministrit.”
Prifti i famullisë, Daniele Micheletti, i tha agjencisë së lajmeve ANSA se dekorimet në kapelë ishin riparuar së fundmi për shkak të dëmtimeve të shkaktuara nga lagështia. Pikturat origjinale datojnë që nga viti 2000 dhe për këtë arsye nuk ishin nën mbrojtjen e trashëgimisë kulturore.
Restaurimi u krye nga i njëjti artist që krijoi pikturën origjinale, Bruno Valentinetti. Ai hodhi poshtë pretendimet se kishte ndryshuar figurën e engjëllit, duke u thënë gazetarëve: “Unë restaurova atë që ekzistonte tashmë… 25 vjet më parë”.
Kryeministrja Giorgia Meloni, nga ana tjetër, shkroi në Instagram, ku postoi një foto të pikturës kontroverse me komentin: “Jo, unë definitivisht nuk dukem si engjëll” me një emotikon qeshës. /tesheshi.com/
