Gazsjellësi Nord Stream 2 do të përfundojë gjithashtu sepse Shtetet e Bashkuara duan marrëdhënie të mira me Bashkimin Evropian, tha Presidenti rus Vladimir Putin.
Gazsjellësi Nord Stream 2, i cili po ndërtohet nga kompania ruse Gazprom, është pothuajse i përfunduar.
SHBA hoqi disa sanksione kundër projektit muajin e kaluar dhe Presidenti Joe Biden atëherë tha se ai vendosi kështu sepse tubacioni ishte ndërtuar pothuajse plotësisht dhe sepse sanksionet e reja do të dëmtonin marrëdhëniet SHBA-Evropiane.
Vëllimi vjetor do të dyfishohet
“Unë mendoj se do të kompletohet, veçanërisht duke pasur parasysh që administrata e re e SHBA po flet për qëllimin e saj për të ndërtuar marrëdhënie të mira me partnerët kryesorë në Evropë,” tha Putini në një forum në Shën Petersburg.
“Si mund të ndërtoni marrëdhënie të mira me partnerët dhe të injoroni interesat e tyre?”, shtoi ai.
Rusia ka përfunduar vendosjen e tubave për linjën e parë të Nord Stream 2 dhe e dyta duhet të përfundojë brenda dy muajsh, tha Putin.
Kur Nord Stream 2 të përfundojë, vëllimi vjetor i rrugës ekzistuese do të dyfishohet në 110 miliardë metra kub.
Nord Stream 2 bën të mundur anashkalimin e Ukrainës, e cila tashmë luan një rol të vogël si një zonë tranziti për gazin rus.
Kievi e kundërshton projektin dhe e shikon atë si një mjet presioni politik.
“Ukraina duhet të tregojë vullnet të mirë”
Gazprom do të fillojë mbushjen e linjës së parë me gaz sa më shpejt që Gjermania të japë dritën jeshile, tha Putini.
Aksionet e Gazprom u rritën 1.3 përqind, duke arritur në 275.70 rubla (pothuajse 3.11 euro) për aksion, më e shumta që nga mesi i vitit 2008.
Eksportet e gazit rus në Evropë tejkalojnë 200 miliardë metra kub këtë vit dhe mund të rriten me sa 50 miliardë metra kub në dekadën e ardhshme, tha Putini.
Ukraina duhet të tregojë vullnet të mirë nëse dëshiron të jetë një tranzit për gazin rus dhe të marrë tarifa të lidhura, vuri në dukje ai. /
