Presidenti rus, Vladimir Putin mbajti sot fjalimin e tij vjetor për gjendjen e vendit, dy javë para zgjedhjeve presidenciale të Rusisë.
Sipas raportimeve nga BBC, Putin ka deklaruar se ushtria ruse ka përparuar në pushtimin dyvjeçar të Ukrainës, në një sërë fushash.
Ndër të tjera, presidenti rus ka paralajmëruar gjithashtu Perëndimin kundër dërgimit të trupave në Ukrainë dhe thotë se Rusia ka armë që mund të godasin territoret e tyre.
Ai akuzon SHBA-në se duan të mposhtin përfundimisht Rusinë dhe pretendon se forcat e NATO-s po përgatiten për të goditur territorin rus.
“Rusia perëndimore duhet të mbrohet siç duhet pas zgjerimit të NATO-s për të përfshirë Suedinë dhe Finlandën”, thotë Vladimir Putin.
Forcat e NATO-s “po përgatiten të godasin territorin tonë”, thotë ai, ndërsa shton se fati i çdo vendi që sulmon Rusinë do të ishte “shumë më tragjik” se çdo gjë që mund të përballet Rusia.
“Ata duhet të kuptojnë se ne kemi gjithashtu armë, armë që mund t’i mposhtin ata në territorin e tyre,” thotë ai, duke shtuar se një veprim i tillë mund të “shkaktojë përdorimin e armëve bërthamore”
Që kur Rusia nisi pushtimin e saj në shkallë të plotë të Ukrainës, marrëdhëniet midis dy kombeve janë përkeqësuar ndjeshëm.
Putin thotë se SHBA-të janë të interesuara të negociojnë vetëm kur ka një përfitim të qartë. Përpara zgjedhjeve të ardhshme në SHBA të cilat do të zhvillohen më vonë këtë vit, ai thotë se politikanët amerikanë duan t’u tregojnë votuesve se “ata ende po sundojnë botën”, shkruan BBC.
Kujtojmë se ky fjalim vjen më pak se dy javë pas vdekjes së Alexei Navalny, një prej kundërshtarëve më të ashpër të Putinit. Familja e Navalny-t akuzon Putinin për orkestrimin e vdekjes së tij, gjë që Kremlini e mohon.