Policia e Durrësit ka arrestuar pronarin e qenit Pitbull, i cili pasditen e djeshme (2 nëntor) në lagjen nr 13 të Durrësit, sulmoi në rrugë një 84-vjeçar.
Mësohet se pronari, 44-vjeçari me iniciale A.L., kishte braktisur qenin e tij, i cili lëvizte i lirë nëpër qytet. Ai akuzohet për veprën penale “Braktisja e kafshës të shoqërimit”.
Ndërkohë, 84-vjeçari vijon të jetë në kujdesin e mjekëve dhe është jashtë rrezikut për jetën.
Njoftimi i policisë
Braktisi qenin e tij Pitbull, i cili sulmoi në rrugë dhe dëmtoi një 84-vjeçar, identifikohet dhe vihet në pranga 44-vjeçari. Në vijim të informacionit paraprak të dhënë pasditen e djeshme, për një 84-vjeçar që ishte sulmuar në rrugë, nga qen të llojit Pitbull, ju informojmë se:
Specialistët për Hetimin e Krimeve të Stacionit të Policisë Plazh identifikuan dhe arrestuan pronarin e kafshës (qen i llojit Pitbull), shtetasin A. L., 44 vjeç, banues në lagjen nr. 13, për veprën penale “Braktisja e kafshës të shoqërimit”.
Ndërkaq, 84-vjeçari vijon të jetë në kujdesin e mjekëve dhe është jashtë rrezikut për jetën.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.