Qeveria e re konservatore greke morri votëbesimin në parlament, një mbështetje kjo ndaj politikës ekonomike, e cila përfshin shkurtimet e taksave dhe stimujt e investimeve.
Kryeministri i Demokracisë së Re, Kyriacos Mitsotakis fitoi bindshëm zgjedhjet parlamentare të 7 korrikut, në krahët e premtimeve për të ulur taksat dhe për të nxitur rritjen ekonomike, duke mundësuar sipas tij, pengimin e një krize afatgjatë borxhi.
“Koha e rritjes së taksave dhe rritja e varfërisë do të zëvendësohet nga një periudhë investimesh dhe pagash të mira”, tha Mitsotakis para ligjvënësve.
“Ne duhet të shkruajmë historinë tonë duke filluar që sot, me miratimin e programit qeveritar”, shtoi ai.
Mitsotakis ka njoftuar planet për reforma të mëdha, duke përfshirë digjitalizimin, racionalizimin e aparatit shtetëror dhe uljen e taksave në përpjekje për të rritur ekonominë.
Greqia ende po përpiqet të dalë nga kriza financiare që e detyroi atë të pranojë tre kredi ndërkombëtare që nga viti 2010.
Mitsotakis tha se reforma dëshiron të nxisë investimet, rritjen ekonomike dhe punësimin dhe në fund të rrisë standardin e jetesës pas dy gati dekade krizë.
Sipas planit të ri të kryeministrit, reformat duhet t’i bindin kreditorët të pranojnë kushte më të buta të shlyerjes së borxheve.
