Qeveria irakiane tha se forcat amerikane kryen sulm ndaj militantëve Hashd al-Shaabi në kufirin irakian me Sirinë, të cilin e vlerësuan si shkelje të sovranitetit të shtetit.
Yahya Rasul, zëdhënës ushtarak i kryeministrit irakian dhe komandantit të Forcave të Armatosura, Mustafa Al-Kadhimi, lëshoi një deklaratë mbi sulmin e SHBA-së ndaj militantëve Hashd al-Shaabi në kufirin Irak-Siri.
“Dënojmë dhe refuzojmë sulmin e SHBA-së në kufirin irakiano-sirian të kryer mbrëmë. Ky sulm, në përputhje me të gjitha marrëveshjet ndërkombëtare, është një shkelje e qartë dhe e papranueshme e sovranitetit dhe sigurisë kombëtare irakiane”, tha Rasul.
Ai theksoi se është e papranueshme që Iraku të ishte sfera e interesit të dikujt dhe se ai do të kryejë të gjitha hetimet e nevojshme në të gjitha nivelet në mënyrë që të mos përsëriten veprime të tilla.
– Grupet shiite paralajmërojnë hakmarrje pas sulmit amerikan
Grupi i quajtur “Koordinimi i Rezistencës Irakiane”, i cili përfshin grupet më radikale të milicive shiite në Irak, njoftoi se do të hakmerren për sulmin e SHBA-ve ndaj milicëve Hashd al-Shaabi në kufirin Irak-Siri.
“Forcat okupuese (SHBA) vazhdojnë sulmet e tyre kundër luftëtarëve irakianë në kufirin Irak-Siri. Ne nuk mund të heshtim pavarësisht ekzistencës së SHBA-ve, pavarësisht nga kushtetuta dhe vullneti i popullit Irakian”, thuhet në një deklaratë me shkrim të bërë nga grupi.
Në deklaratën e grupit të milicisë thuhet se “ne do ta bëjmë armikun (SHBA) të shijojë dhimbjen e hakmarrjes”.
Grupi militant Ketaib Sayyid’ul Shuheda i lidhur me grupin Hashd al-Shaabi njoftoi se katër pjesëtarë të tij u vranë në një sulm të kryer nga SHBA-ja në kufirin irakiano-sirian.
Një shërbim funerali do të mbahet në Bagdad për të vrarët në sulm.
Batalioni Ketaib Sayyid’ul Shuheda është një milici shiite irakiane e themeluar në vitin 2013.
