Qeveria në Gaza njoftoi se Izraeli ka shkatërruar më shumë se 60 për qind të shtëpive në Rripin e Gazës.
Në deklaratën me shkrim nga Zyra e Qeverisë për media thuhet: “Populli ynë ndodhet përballë një fatkeqësie të vërtetë humanitare për shkak se ushtria izraelite ka shkatërruar më shumë se 60 për qind të shtëpive në Rripin e Gazës, kryesisht në pjesën veriore”.
“Në këto shtëpi jetonin më shumë se 50 mijë familje, shtëpitë e të cilëve u shembën plotësisht në sulmet e mëparshme të Izraelit dhe se sistemi shëndetësor në Gaza është në kolaps serioz. Për shkak të sulmeve izraelite kanë mbetur jashtë funksionit mbi 26 spitale dhe 55 qendra shëndetësore”, thuhet në deklaratë.
– Ka nevojë për 1.000 kamionë me ndihma dhe 1 milion litra karburant në ditë
“Nën rrënoja ka ende mijëra të vdekur ndërsa ekipet e Mbrojtjes Civile nuk kanë mundur t’i nxjerrin trupat për shkak se Izraeli shënjestron pajisjet dhe makineritë dhe për arsye të pamundësisë për të siguruar karburant për pajisjet dhe makineritë tashmë të shkatërruara”, theksohet në deklaratë.
Më tej bëhet e ditur se në rajon ka nevojë për 1.000 kamionë me ndihma dhe 1 milion litra karburant në ditë në mënyrë që të fillojë procesi i përmirësimit në Rripin e Gazës.
Qeveria në Gaza u bën thirrje vendeve arabe dhe islame të “zhvillojnë plan urgjent shpëtimi me qëllimin për të gjetur zgjidhje të shpejtë humanitare për të ndihmuar në strehimin” e më shumë se një çerek milion familjeve, shtëpitë e të cilave janë shkatërruar dhe dëmtuar” si dhe kërkohet ngritja e spitaleve fushore të pajisur me pajisje mjekësore.
Burimi: AA
