Ndonëse çmimi i karburantit ka pësuar një rënie të ndjeshme, qeveria në mënyrë ende të pashpjegueshme nuk heq dorë nga kontrolli i çmimeve në këtë treg.

 

Duke raportuar në Komisionin e Ekonomisë, deputetë të mazhorancës dhe opozitës u përfshinë në diskutime dhe debate me kreun e Autoritetit të Konkurrencës. Ky i fundit thotë se nuk ka konstatuar anomali në tregun e karburanteve.

 

DENAR BIBA

AUTORITETI I KONKURRENCËS

 “Autoriteti i Konkurrencës ka dhënë një opinion tangent për aq sa vlerësuam në atë vendimmarrje, që bordet e këtij karakteri vijnë në kundërshtim me të drejtën e konkurrencës, por rast pas rasti, jo më larg se dje qeveria e Britanisë së Madhe ka nisur diskutimin me supermarketet për të vendosur një çmim tavan vullnetar. Vullnetarisht e ka dhe Greqia por ka vendosur një lloj penaliteti në rast se kalojnë mbi një vlerë të caktuar taksimi do të jetë trefish nga ana e shtetit. Bordet kanë ekzistuar në historinë e çdo ekonomie botërore, në situata krizash ka pasur borde. Në lidhje me karburantet ne nisëm një hetim që rezultoi pa gjetje. Në termat e ligjit legjislacioni i mundëson autoritetit të konkurrencës të hyjë si vëzhgues e më pas si ndëshkues i këtyre fushave të caktuara”

 

Për opozitën është e papranueshme, se si përfaqësues të qeverisë dhe të biznesit privat ulen në një tryezë dhe përcaktojnë çmimet e tregut.

 

JORIDA TABAKU

DEPUTETE E PD

“Është e paprecedente, që bizneset ulën në një tryezë me shtetin dhe vendosin cmime. Nuk është në interest ë qytetarëve. si në tregun e karburnateve dhe të ushqimeve rritja ka qënë në dakortësi me shtetit dhe kompnive që kanë marrë pjesë në dëm të interesit publikë.”

 

Edhe për deputetin Erion Braçe, tregu i hidrokarbureve funksionon në shkelje të ekonomisë së lirë të tregut, ndaj kërkon hetim.

 

ERION BRAÇE

DEPUTET I PS

“E dini që tani ka një broker që blen naftën në bursë dhe e sjell në Shqipëri? Lihet në depozita pa çmim dhe çmimi del ditën kur del malli. A e kuptoni se s’ka konkurrencë kur ka 1 shitës. 1 blerës dhe 1 shitës. Si mund të ketë konkurrencë kur çmimi është ai që sjell brokeri dhe kjo s’ju ka rënë në sy fare? Hetoni e hetoni dhe këtë skemë nuk e cënon askush? A e kuptoni që kemi konkurrencë nga depozitë deri te pompa. Konkurrenca është kufizuar me 20% të tregut. E rëndësishme është ndjekja e tregjeve dhe atyre që blejnë.”

 

Ngritja e Bordit të Transparencës u ankimua nga opozita në Gjykatë Kushtetuese, por në prill gjyqtarët vendosën që çmimet për karburantet të vijojnë të përcaktohen me vendim bordi.

Subscribe kanalin tonë në Youtube për të mos humbur asnjë video të re