Rama nga Dubai: Çmenduri totale, do të shkojë 1000 euro megavati për orë i energjisë, ama ne do ta kalojmë bashkë këtë

Teksa është nisur për një vizitë në Dubai, kryeministri Edi Rama ka vijuar të postojë në Facebook shqetësimin e tij për rritjen e çmimit të enegjisë në bustë.

Edhe pse të gjithë specialistët thonë se vitin e kaluar, ka pasur një rekord në prodhimin e energjisë në kaskadën e Drinit, sipas Ramës, vendi ynë ende nuk i plotëson nevojat e konsumit me prodhimin hidrik.

Sipas tij çmimi do të vijojë të rritet, edhe pse konsumtorët shqiptarë nuk do ta ndjejnë këtë në faturat e tyre, por nuk mund të themi të njëjtën gjë për çmimet e të gjitha produkteve të tjera që kanë kapërcyer ndjeshëm.

Rama në Facebook:

Shqipëria nuk e prodhon ende dot të gjithë sasinë e energjisë që i nevojitet.

Prodhimi ynë varet nga reshjet e shiut e të borës, të cilat për vitin e tretë rresht janë shumë më të ulëta se sa deri tri vite më parë!

Kjo çon deri në pikën që thuajse gjysma e nevojave për energji të mbulohet nga importi, ndërkohë që prej disa muajsh bota ka hyrë në një krizë energjitike. Tanimë edhe për shkak të luftës në Ukrainë, çmimi për megavat vazhdon të rritet çmendurisht, orë e çast, nga 52 euro vjet në 550 euro aktualisht!

Gjasat janë që rritja marramendëse të vazhdojë dhe parashikimet shkojnë deri në çmendurinë totale të 1000 eurove për megavat orë!

Qysh me shfaqjen e shenjave të krizës energjitike, qeveria ka paralajmëruar kohë të vështira përpara dhe ka vendosur një mburojë financiare për familjet dhe biznesin e vogël.

Sot Shqipëria është ndoshta i vetmi vend që nuk e ka rritur asnjë qindarkë faturën e energjisë; aktualisht çmimi i importit për kilovat ka shkuar 61 lek, ndërkohë që familjarët vijojnë ta paguajnë kilovatin 9.5 lek!

Të gjithë këtë diferencë të frikshme ekonomikisht e mbulon krejtësisht shteti, përtej 45 milionë USD që shkojnë çdo vit nga buxheti i shtetit për kompensimin e 2.5 lekëve për kilovat për çdo familje në nevojë.

Kostoja tejet e lartë e kësaj mburoje unikale rritet përditë dhe ne do të vazhdojmë ta financojmë sa të mundemi.

POR të gjithë duhet të vetëdijësohen se tanimë tregu i energjisë është pengu më i madh i luftës, e cila nuk sjell kurrë të mira, po vetëm dhimbje.

Këtë luftë nuk e ka zgjedhur Shqipëria dhe ne shqiptarët as nuk e ndalim dot, as nuk shmangim dot. Duhet vetëm ta përballojmë me kurajo, besim dhe durim. Të bashkuar jo të ndarë.