VALENTINA MADANI/ Anëtari i Këshillit Kombëtar të Berishës, Aleksandër Biberaj, shprehet se shkak për rezultatin e dobët të opozitës në zgjedhjet lokale të 14 majit, ka qenë përçarja e opozitës dhe manipulimet e bëra nga qeveria.
Gjatë intervistës në emisionin “Kjo Javë” në “News 24”, ai apeloi se PD duhet të hapet dhe të përfshijë në gjirin e saj intelektualë dhe persona të papërlyer nga pushteti. Ai shtoi gjithashtu se PD ka nevojë për një lidership të ri dhe sipas tij, qeveria mund të rrëzohet lehtë nëse do të ketë protesta të vërteta dhe të mirorganizuara.
“Situatë politikë e keqe. Një qeverisje arrogante e prepotente e zhytur në krim e korrupsion por nga ana tjetër kemi një opozitë të përçarë. Mendohej të bashkoheshin nga opozita, por kjo nuk ndodhi e për pasojë erdhi rezultati më i dobët në 32 vite në këto zgjedhje. Ne nuk arritën të krijojmë një pol politik të rëndësishëm. Nuk arritëm të krijojmë një frymë ndryshimi dhe revolucioni demokratik. Që në përçarjen që ndodhi në PD nuk arritën të bashkoheshim, dështimi i dytë kishte të bënte me daljen në koalicion, fakt që ishim të detyruar ta bënim pas vendimit të gjykatës. Por duhet ta bënim më herët sepse dihej që vendimi i gjykatës do vinte në një kohë të përshtatshme për qeverinë. Kjo na dëmtoi sepse gjysma e këshillave bashkiakë tashmë i ka marrë Partia e Lirisë. Para disa vitesh ne e mbështetëm Berishën që ‘kushtëzohej’ me: largimin e Bashës, bashkimi i partisë dhe i së djathtës, duhet të luftonim për të rrëzuar qeverinë e Ramës, të gjitha këto nuk ndodhën, ishin një sërë dështimesh.
Foltorja ishte një grup i izoluar dhe nuk e hapi lojën, Berisha sot rrethohet nga një koracë e disa personave të dështuar e të konsumuar nga pushteti. Berisha duhet të marrë nismën për të krijuar një këshill të urtësh, të jenë intelektualë me vlera që i kanë dhënë PD, figura të pastra e të papërlyera. Në PD i është ‘prerë koka’ shumë intelektualëve për t’i hapur rrugë Lulzim Bashës”, deklaroi Biberaj.
Pyetjes nëse një ikje e Berishës do ta shkërmoqte PD, ai iu përgjigj: “Jo nuk jam dakord. Ata janë vota të Berishës por edhe të demokratëve”. Lidhur me mundësinë e protestive, Aleksandër Bebiraj u shpreh: “Sot nuk dalin më njerëzit në protestë. Ne nuk kemi nevojë të protestojmë me tullumbace e trëndafila. Protesta është për të arritur një objektiv. Kishte kohë e mundësi opozita, pse nuk e bëri nuk e di atë e di vetëm lidershipi se ato i marrin vendimet. Kemi degradim të besimit të demokratëve në lidershipin e partisë. PD ka nevojë për një garë e një lider të ri. Rama rrëzohet për tre muaj me protesta, pra protesta jo xhiro në Bulevard. Rrethohet Kryeministria e nuk largohet deri në largimin e tij”, theksoi anëtari i Këshillit Kombëtar të PD-së.
