Sipas raportit më të fundit të KLSH, në Spitalin e Traumës mungon frigorifer morgu, sikurse medikamentet qëndrojnë në magazine me lagështirë dhe kushtet të papërshtatshme. Gjithashtu, KLSH ka gjetur në farmacinë e spitalit, ilaçe pa vulën e kuqe, që ndalon shitjen e tyre.
Në Spitalin e Traumës nuk ka frigorifer-morgu, për të bërë administrimin e trupave të pacientëve që ndërrojnë jetë në spital. Në vitin 2021 pranë këtij spitali ndërruan jetë 90 pacientë dhe sipas Kontrollit të Lartë të Shtetit trajtimi i trupave nuk u bë në këtë spital.
Më tej në raportin e KLSH, thuhet se magazina e mallrave të spitalit nuk plotëson asnjë kusht për ruajtjen e barnave.
“Barnat nuk duhet të jenë në kontakt të drejtpërdrejtë me dyshemenë dhe muret e të kenë hapësirë të përshtatshme për të lejuar pastrimin dhe inspektimin’, vlerëson KLSH.
Përkundrazi në këtë ambient gjenden pajisje mjekësore jashtë përdorimit si radiografi, me rrezikshmëri për shëndetin e njeriut. KLSH rekomandon drejtorinë të sigurojë kushte në ambiente të sigurta për ruajtjen e barnave.Në asnjë rast ato nuk duhet të vendosen në magazinën e mallrave.
Një tjetër konstatim i KLSH, ka të bëjë me medikamentet në farmacinë qendrore të QSUT. Në raport thuhet se aty gjenden sasi të madha ilaçesh që nuk kishin vulën e kuqe me mbishkrimin “Për përdorim spitalor ndalohet shitja”, përcaktim ky me ligj.
“Boja që përdorët për stampimin e vulës të jetë me ngjyrë të kuqe që nuk fshihet”, thuhet në raport.
Burimi: Shqiptarja.com