Organizatorja ndërkombëtare e ngjarjeve më të rëndësishme sportive, RCS Sport & Events, njëkohësisht organizatore e Giro d’Italia, ka adresuar një letër falënderimi ndaj Policisë së Shtetit shqiptar, për kontributin dhe profesionalizmin e treguar në garantimin e mbarëvajtjes së tri etapave të kësaj gare historike, të zhvilluara për herë të parë në Shqipëri, më 9, 10 dhe 11 maj 2025.
Në letrën e mirënjohjes dërguar autoriteteve shqiptare, ndër të tjera theksohet:
“Shprehim konsideratën më të lartë për të gjitha strukturat e Policisë së Shtetit shqiptar.
Shërbimi i eskortës, i realizuar me përpikmëri nga efektivët e Policisë Rrugore, që shoqëruan çiklistët gjatë çdo faze të garës, si dhe siguria e garantuar në çdo pikë kritike të itinerarit nga Policia e Shtetit, vërtetuan aftësinë organizative dhe shkallën e lartë të trajnimit të strukturave tuaja.
Rezultati i arrirë, si në aspektin sportiv ashtu dhe në sigurinë e garës, ka qenë maksimal, dhe është vlerësuar unanimisht nga mediat sportive, organizmat më të larta të çiklizmit ndërkombëtar, kolegji i komisarëve, drejtoria e garës, si dhe nga të gjitha skuadrat pjesëmarrëse.”
Ky vlerësim i lartë nga një organizatë prestigjioze si RCS Sport & Events është një dëshmi e përkushtimit, profesionalizmit dhe gatishmërisë së strukturave të Policisë së Shtetit për të menaxhuar me sukses evente të përmasave ndërkombëtare.
