Dymbëdhjetë vende, përfshirë Shtetet e Bashkuara, Britania, Japonia dhe Australia, së bashku të dielën dënuan gjakderdhjen në Mianmar një ditë më parë, kur të paktën 90 njerëz, përfshirë disa fëmijë, u vranë pasi policia hapi zjarr ndaj protestuesve..

“Një ushtri profesionale ndjek standardet ndërkombëtare të veprimit dhe është përgjegjëse për mbrojtjen e njerëzve të cilëve u shërben, duke mos i dëmtuar ata. Ne u bëjmë thirrje Forcave të Armatosura të Mianmarit të ndalojnë dhunën dhe të punojnë me njerëzit për të rivendosur respektin dhe besueshmërinë që ata kanë humbur për shkak të veprimeve të tyre,” tha deklarata e përbashkët.

Protestuesit kundër grushtit të shtetit ushtarak të 1 shkurtit dolën në rrugët e Yangon, Mandalay dhe qytete të tjera të shtunën, ditën kur ushtria festoi Ditën e Forcave të Armatosura, duke injoruar një paralajmërim se ata mund të qëlloheshin.

“Forcat e grushtit të shtetit qëlluan nga armët automatike në zonat e banuara. Shumë civilë u vranë, duke përfshirë gjashtë fëmijë midis moshës 10 dhe 16,” tha Shoqata për Ndihmë për të Burgosurit Politikë (AAPP).

Sipas grupit të aktivistëve, viktimat e fundit i shtohen numrit të të paktën 328 të vrarëve në shtypjen e protestave që shpërthyen pas përmbysjes së qeverisë Aung San Suu Kyi.