Komisioni Evropian miratoi një paketë me vlerë 220 milionë euro për të përmirësuar mbikëqyrjen e kufirit lindor të Turqisë.

Me paketën e fundit, mbështetja e Bashkimit Evropian për refugjatët në Turqi dhe për menaxhimin e kufirit turk arriti në 1.2 miliardë euro këtë vit, transmeton Anadolia.

“Këto fonde janë pjesë e tre miliardë eurove shtesë, të shpallura në qershor 2021, pas Këshillit të BE-së, për vazhdimin e ndihmës së BE-së për refugjatët në Turqi midis 2021 dhe 2023”, thuhet në deklaratën e KE.

Paketat e asistencës me katër programe

Komisioni vuri në dukje se paketat e ndihmës të miratuara në vitin 2022 përbëhen nga katër programe, duke përfshirë ndihmën financiare për mbështetjen e refugjatëve, projektet që zbatojnë strategjinë e punësimit të Turqisë dhe një program të qëndrueshëm social-ekonomik për refugjatët, programin e Rrjetit të Sigurisë Sociale Plotësuese Emergjente (ESSN) në sigurimin e parave të gatshme për refugjatët e moshuar dhe me aftësi të kufizuara dhe për masat e kontrollit kufitar.

Sipas Oliver Varhelyi, Komisioneri Evropian për Fqinjësinë dhe Zgjerimin, paketa tregon përkushtimin e BE-së për të punuar me Turqinë ndërsa vendi vazhdon të “strehojë refugjatët dhe të trajtojë flukset e parregullta të migracionit”.

“Ne mezi presim të vazhdojmë këtë punë të rëndësishme me Turqinë, në përputhje me deklaratën e marsit 2016, duke përfshirë përpjekjet e shtuara për të frenuar flukset e parregullta të migracionit, rritjen e zhvendosjes dhe vazhdimin e kthimeve nga ishujt grekë”, tha Varhelyi, sipas deklaratës.

Varhelyi shtoi se, “si një element i ri, ne do të punojmë për të mbështetur sigurinë e kufijve lindorë të Turqisë për të parandaluar migrimin e parregullt, duke mobilizuar 220 milionë euro përmes dorëzimit të pajisjeve të mbikëqyrjes moderne”.

Sipas marrëveshjes së migracionit të vitit 2016 midis Brukselit dhe Ankarasë, Turqia është e detyruar të pranojë të gjithë azilkërkuesit e parregullt që mbërrijnë në ishujt grekë nga toka turke.

Një pikë kryesore tranziti

Në këmbim, BE ra dakord të rivendoste refugjatët sirianë nga Turqia përmes kanaleve zyrtare.

Deklarata shtoi se blloku ka mobilizuar 9.5 miliardë euro për refugjatët dhe komunitetet pritëse në Turqi që nga viti 2015.

Turqia është një pikë kyçe tranziti për migrantët e parregullt që duan të kalojnë në Evropë dhe të fillojnë një jetë të re, veçanërisht ata që ikin nga lufta dhe persekutimi në vendet e tyre.

Turqia tashmë ka pranuar rreth katër milionë refugjatë, më shumë se çdo vend tjetër në botë.