Kryeministri Edi Rama ka reaguar pas rezultatit paraprak të zgjedhjeve të pjesshme në Kukës, ku kandidati i PS është në avantazh me rreth 3000 vota më shumë se rivali i “Bashkë Fitojmë”.
Rama shkruan se ky avantazh i kandidatit socialist, Albert Halilaj, përkundrejt rivalit Emri Vata do të thellohet ende, deri në kurorëzimin e një fitoreje shembullore.
Kjo sipas kreut të qeverisë, “flet qartë për besimin dhe për pritshmërinë e qytetarëve kuksianë ndaj nesh”.
Postimi i Ramës:
Kur janë numëruar pak më shumë se gjysma e kutive të votimit, kandidati i Partisë Socialiste për Bashkinë e Kukësit ka një avantazh të pakthyeshëm prej thuajse 3000 votash, i cili do të thellohet ende deri në kurorëzimin e një fitoreje shembullore, që flet qartë për besimin dhe për pritshmërinë e qytetarëve kuksianë ndaj nesh, si edhe për detyrimin tonë të madh ndaj tyre, për të bërë shumë më shumë akoma për Kukësin🙏
FALEMINDERIT KUKËS, FALEMINDERIT TË GJITHËVE
